RC RUVUMA awatahadharisha madiwani wapya

Imewekwa kuanzia tarehe: December 4th, 2025

Mkuu wa Mkoa wa Ruvuma, Brigedia Jenerali Ahmed Abbas Ahmed, ametoa rai nzito kwa madiwani wapya wa Halmashauri ya Wilaya ya Namtumbo akisisitiza kuwa uaminifu walioupata kutoka kwa wananchi ni heshima kubwa inayokwenda sambamba na wajibu mzito wa kusimamia maendeleo, nidhamu na uwajibikaji wa hali ya juu.

Akifungua baraza maalumu la madiwani, RC Abbas alisema changamoto kubwa inayozikabili halmashauri nyingi nchini ni upungufu wa mapato ya ndani, hali inayokwamisha miradi muhimu kutotekelezwa kwa wakati. Kwa mujibu wa takwimu za Ofisi ya Mdhibiti na Mkaguzi Mkuu wa Hesabu za Serikali (CAG), zaidi ya asilimia 35 ya hoja za ukaguzi hutokana na usimamizi hafifu wa makusanyo ya mapato katika mamlaka za serikali za mitaa.

“Ni wajibu wenu kuhakikisha vyanzo vyote vya mapato vinatambuliwa, vinawekewa mifumo na vinatumika ipasavyo bila mianya ya upotevu,” alisema RC Abbas, akiwataka madiwani kufuatilia kwa karibu uwajibikaji wa watendaji na kuhakikisha fedha za umma zinatumika katika maeneo yaliyopewa kipaumbele kama afya, elimu, maji na miundombinu, sambamba na kuzingatia Sheria ya Serikali za Mitaa Na. 7 ya mwaka 1982 na Sheria ya Fedha za Mamlaka za Serikali za Mitaa.

Akizungumzia miradi ya maendeleo, kiongozi huyo alionesha masikitiko yake kuhusu tabia ya kutokuwapo kwa usimamizi wa kutosha, hali inayosababisha miradi kukamilika chini ya viwango au kugundulika kasoro wakati tayari fedha zimetumika. Alitolea mfano wa maeneo ambako wananchi hujitolea kujenga maboma ya shule au zahanati, lakini halmashauri huishia kuanzisha mradi mpya badala ya kuendeleza kile kilichokwishaanzishwa.

“Madiwani mna wajibu wa kuhakikisha ‘value for money’. Haiwezekani mradi uanze na ukamilike ninyi mpo, lakini kasoro zibainike mwisho.

Katika kipengele cha kushughulikia changamoto za wananchi, RC Abbas alitaka madiwani kuyapa kipaumbele masuala ya maji safi, miundombinu, ajira za vijana, migogoro ya ardhi, huduma za afya na malalamiko ya kodi zisizofuata taratibu. Alisisitiza kuwa baraza la madiwani linapaswa kuwa daraja kati ya serikali na wananchi, si mahali pa mabishano yasiyo na tija.

Kuhusu hali ya nchi na changamoto za maandamano yaliyoshuhudiwa katika baadhi ya maeneo, alisisitiza umuhimu wa kulinda amani, kutoa elimu sahihi na kuhimiza utii wa sheria, akisema bila utulivu hakuna mradi unaoweza kutekelezwa.

“Mkoa wa Ruvuma una uwezo wa kupiga hatua kubwa. Tukisimamia mapato vizuri, tukikamilisha miradi kwa wakati na kutatua changamoto za wananchi, tutaleta mageuzi ya kweli,” alisema.

Hadi sasa Mkuu wa Mkoa wa Ruvuma amezindua mabaraza mapya ya madiwani katika Halmashauri za Songea,Nyasa,Manispaa ya Songea na Namtumbo.