TANZANIA yaanza safari mpya ya kisayansi,Rais Samia azindua kiwanda cha urani Namtumbo

Imewekwa kuanzia tarehe: July 31st, 2025

Tanzania imeandika historia mpya katika sekta ya madini na nishati baada ya Rais wa Jamhuri ya Muungano wa Tanzania, Mhe. Dkt. Samia Suluhu Hassan, kuzindua rasmi Kiwanda cha Majaribio cha Uchenjuaji wa Madini ya Urani kilichopo wilayani Namtumbo, mkoani Ruvuma. Uzinduzi huo uliofanyika Julai 30, 2025, mbele ya maelfu ya wananchi, viongozi wa kitaifa na wadau wa sekta ya madini, umetajwa kuwa hatua muhimu ya kuisogeza Tanzania katika uchumi wa kisasa unaojengwa kwa msingi wa maarifa na matumizi ya rasilimali za ndani.

Rais Samia amesema kuwa moyo wake umejaa furaha, matumaini na imani kubwa kuwa Tanzania sasa imefungua ukurasa mpya katika matumizi ya madini ya urani kwa faida ya taifa, hususan katika uzalishaji wa nishati ya nyuklia, tiba za saratani na tafiti za kisayansi za hali ya juu. “Leo tumefungua mlango mpya wa fursa, ajira na mapinduzi ya kisayansi kwa kizazi cha sasa na kijacho,” alisema Rais Samia huku akishangiliwa na umati wa wananchi waliofurika katika viwanja vya Shule ya Sekondari Likuyu.

Kwa mujibu wa taarifa za kitaalamu, maeneo ya Mto Mkuju wilayani Namtumbo yanakadiriwa kuwa na uwezo wa kuzalisha hadi tani 300,000 za madini ya urani kwa mwaka, kiasi ambacho kinaifanya Tanzania kuwa miongoni mwa nchi chache barani Afrika zenye hifadhi kubwa ya madini hayo ya kimkakati. Urani hutumika duniani kote kama chanzo muhimu cha nishati ya nyuklia inayoweza kuchangia zaidi ya asilimia 10 ya umeme unaotumika duniani.

Kiwanda hicho cha majaribio, kinachoendeshwa na Kampuni ya Mantra Tanzania Limited, kimegharimu mabilioni ya shilingi na kitazalisha ajira zaidi ya 4,000 kwa Watanzania katika hatua mbalimbali za utekelezaji wa mradi huo. Aidha, kiwanda hicho kinatarajiwa kuwa msingi madhubuti wa kuanzishwa kwa kiwanda kikubwa na cha kudumu cha kuchakata urani kwa matumizi ya ndani na kuuza nje ya nchi.

Katika hotuba yake, Rais Samia aliwahakikishia wananchi kuwa serikali imeweka mifumo madhubuti ya kuhakikisha usalama wa kiafya, kimazingira na kijamii katika utekelezaji wa mradi huo mkubwa. Pia alisisitiza kuwa faida ya rasilimali hiyo lazima iwanufaishe Watanzania kwa kutoa ajira, kukuza uchumi wa maeneo husika na kuchochea mageuzi ya kisayansi nchini. “Tanzania ya viwanda, Tanzania ya maarifa, na Tanzania ya kisasa inaanzia hapa Namtumbo,” alisema kwa msisitizo.

Uzinduzi huo umeibua hisia za matumaini kwa wakazi wa Namtumbo na mkoa mzima wa Ruvuma, ambapo wananchi walionesha furaha yao kupitia burudani, ngoma za asili na mabango yenye ujumbe wa kuunga mkono juhudi za serikali. Pia, viongozi mbalimbali wa kitaifa akiwemo Waziri wa Madini Mhe. Anthony Mavunde, walitoa pongezi kwa Rais Samia kwa uthubutu wa kuliongoza taifa katika dira mpya ya maendeleo ya kisayansi.
Uzinduzi wa Kiwanda cha Majaribio cha Uchenjuaji Urani si tu unaashiria mwanzo wa mwelekeo mpya wa Tanzania katika matumizi ya madini ya kimkakati, bali pia unaweka msingi wa mageuzi ya kisekta, kiuchumi na kielimu. Ni hatua ya kihistoria inayothibitisha dhamira ya Rais Samia ya kulijenga taifa la kisasa, lenye maarifa, teknolojia na maendeleo jumuishi yanayogusa maisha ya kila Mtanzania.