MANISPAA ya Songea yatumia milioni 30 kutengeneza madawati 500

Imewekwa kuanzia tarehe: February 6th, 2020

Halmashauri ya Manispaa ya Songea imetumia shilingi milioni 30  kwa ajili ya utengenezaji madawati 500,yatakayotumika kwa wanafunzi wa shule ya Msingi na Sekondari.

Kwa mujibu Afisa Elimu Msingi Manispaa ya Songea Zakia Fandey Idara inatarajia kugawa madawati 200 yenye thamani ya sh.milioni 10, ikiwa ni  fedha za mapato ya ndani ya bajeti ya mwaka wa fedha 2019/2020.

“Mahitaji ya madawati kwa sasa katika shule za msingi Manispaa ya Songea ni 17822, madawati yaliyopo ni 14958 na pungufu ni 2864’’,alisema.

Katika kukabiliana na changamoto hiyo, Manispaa ya Songea katika Bajeti 2020/2021,imetenga  zaidi ya shilingi milioni 20  ambayo itatumika kutengeneza madawati 400.

Naye Afisa Elimu Sekondari Manispaa ya Songea  Devota Luwungo, amesema Idara yake inatarajia kugawa Viti na  Meza 300 vyenye thamani ya  sh.milioni  20 ikiwa ni  fedha za mapato ya ndani Bajeti ya 2019/2020.

Hata hivyo amesema, Mahitaji ya meza kwa sasa ni 15214, yaliyopo kwa sasa  ni 9733, upungufu ni 5481 ambapo  mahitaji halisi ya viti  kwa sasa  ni 15214, yaliyopo ni 9990, na pungufu ni 5224.

Aidha katika kutatua changamoto katika shule za sekondari, Manispaa ya Songea  katika mwaka 2020/2021,imetenga  zaidi ya sh.milioni 15 kwa ajili ya kutengeneza viti na meza 230.

Manispaa ya Songea ina shule za msingi 94 na shule za sekondari 40.

 Imeandaliwa na Amina Pilly

Afisa Habari Manispaa ya Songea 

Februari 6,2020