RAIS Samia atoa shilingi milioni 256 kuboresha miiundombinu ya elimu Namtumbo

Imewekwa kuanzia tarehe: March 29th, 2025

Rais wa Jamhuri ya Muungano wa Tanzania, Mhe. Samia Suluhu Hassan, ametoa shilingi milioni 256 kwa ajili ya ujenzi wa mabweni mawili katika Shule ya Sekondari Korido, iliyopo Kata ya Mchomoro, Kijiji cha Songambele, Wilaya ya Namtumbo. 

Ujenzi wa mabweni haya unalenga kuboresha mazingira ya kujifunzia kwa wanafunzi wanaotoka maeneo ya mbali.

Mabweni hayo mawili yatakuwa na jumla ya vyumba 40 na vyoo vyenye matundu 20, hatua inayotarajiwa kupunguza changamoto ya wanafunzi kutembea umbali mrefu kufika shuleni. 

Hatua hii ni sehemu ya juhudi za serikali katika kuboresha sekta ya elimu kwa kuhakikisha wanafunzi wanapata mazingira salama na rafiki ya kusoma.

Kulingana na mpango wa ujenzi huo, bweni moja litakuwa na vyumba 20 na vyoo 10 kwa ajili ya wavulana, huku bweni lingine likitengwa kwa wasichana kwa mpangilio sawa. 

Hii itasaidia kupunguza msongamano wa wanafunzi na kuwapatia nafasi bora ya kujifunza.

Hatua hii ya Rais Samia inalenga kuongeza ufaulu wa wanafunzi kwa kuwaondolea changamoto zinazoweza kuathiri maendeleo yao kitaaluma. 

Mpango huu ni mwendelezo wa juhudi za serikali katika kuinua kiwango cha elimu nchini kwa kuboresha miundombinu shuleni.

Wananchi wa Wilaya ya Namtumbo wamepokea kwa furaha msaada huo na kumshukuru Rais Samia kwa kujali elimu ya watoto wao.