WALIMU 600 kuajiriwa na mradi wa GPE

Imewekwa kuanzia tarehe: March 1st, 2024

Mradi wa  Global Partnership for Education (GPE) utaongeza fursa ya upatikanaji wa Elimu bora kwa watoto kuanzia ngazi  ya Elimu ya Awali, Msingi, Elimu maalum na Elimu kwa walio katika mfumo usio rasmi hususan wanaotoka katika mazingira hatarishi.

Hayo yamesemwa na Kaimu Katibu Tawala wa Mkoa wa Ruvuma Jumanne Mwankhoo wakati akifungua kikao cha (GPE) kilichofanyika katika Ukumbi wa Hospital ya Rufaa ya Mkoa,Songea.

Serikali kupitia mradi huo inatarajia kuajiri walimu wa kujitolea  600 ambao watalipwa kila mwezi shilingi laki tatu na kwamba mradi huo wa miaka miwili unatekelezwa  kwa ufadhili wa shilingi bilioni 212.

Mwankhoo amesema kupitia mradi huo serikali  itaboresha mazingira ya walimu kwa kujenga nyumba za walimu katika maeneo ya pembezoni  na kuwahamasisha walimu kwa kuwapa motisha 

“Mradi wa GPE unatoa ufadhili wa masomo kwa walimu wanaofundisha elimu maalumu ili kuwajengea uwezo mkubwa zaidi katika kazi”, amesema Mwankhoo.

Amelitaja lengo la mradi huu kuwa  ni kuimarisha mfumo wa motisha kwa walimu wanaofundisha shule za pembezoni na kutekeleza mpango wa ajira kwa walimu wa kujitolea ambapo zaidi ya walimu 600 wataingizwa katika mradi huo na kupewa posho ya shilingi laki  tatu kwa mwezi.

Naye Mjumbe wa Kamati ya Maandalizi kutoka Wizara ya Elimu, Sayansi na Teknolojia Dionice Lukweme amesema mradi huo umekuja na mfumo ambao utawezesha kuwasimamia walimu watakaokuwa wanajitolea katika shule.

Amesisitiza kuwa  kupitia mfumo huo  watakuwa na takwimu ya walimu wote wanao jitolea katika shule zote nchini.

Kwa upande wake Mwezeshaji kutoka Ofisi ya Mkuu wa Mkoa wa Dar es salam Eva Mosha amesema mradi unatengeneza mazingira rafiki  ya kufundisha na kujifunza Kwa wanafunzi wenye mahitaji maalum na walimu,

 Amebainisha zaidi kuwa mradi huo  unafadhiliwa kwa Dola za Marekani milioni 84 ambazo ni zaidi ya shilingi bilioni 212 ambapo amekitaja  kipaumbele cha kwanza ni kujenga nyumba za walimu katika Halmashauri ambazo zipo pembezoni.

Mwalimu Mkuu wa Shule ya Msingi Mfaranyaki Zuhura Nikata amesema mradi huu utatatua changamoto za walimu kwa asilimia 90 kwa kuwa utawajengea  walimu makazi jirani na vituo vyao vya kazi na kutoa posho kwa walimu wanaojitolea Kwa muda wa miaka miwili.

Kwa upande wake Mwalimu wa Shule ya Msingi Amani, Ayubu Ng'ombo Yahaya amesema mradi huu utawasaidia walimu kupata mbinu mpya za  kufundishia na kuhamia katika mfumo wa kisasa wa kijiditali.