MWANGA mpya Ifinga zahanati yakaribia kuanza kutoa huduma

Imewekwa kuanzia tarehe: June 8th, 2025

Wananchi wa Kijiji cha Ifinga  Katika Halmashauri ya Madaba mkoani Ruvuma  wameanza kuona mwanga wa matumaini baada ya Mkurugenzi Mtendaji wa Halmashauri hiyo, Ndugu Sajidu Idrisa Mohamed, kufanya ziara maalum kukagua maendeleo ya ujenzi wa Zahanati ya Ifinga na kueleza kuridhishwa kwake na hatua ya kukamilika kwa awamu ya kwanza ya ujenzi huo. Ziara hiyo imeashiria hatima ya ukombozi wa huduma za afya kwa mamia ya wakazi wa eneo hilo.

Katika ziara hiyo, Mkurugenzi aliambatana na wataalamu wa sekta mbalimbali kutoka halmashauri, ambapo alitoa maagizo ya haraka kuhakikisha sehemu iliyosalia ya ujenzi inakamilika ndani ya muda mfupi. Alisisitiza kuwa lengo kuu ni kuhakikisha wananchi wa Ifinga na vijiji jirani wanaanza kupata huduma bora za afya mapema iwezekanavyo bila kulazimika kusafiri umbali mrefu, hali iliyokuwa ikihatarisha maisha ya kina mama wajawazito na watoto.

“Mradi huu ni mkombozi kwa wananchi wa Ifinga. Hatutaki kuona tena mama mjamzito anapanda bodaboda kwenda kilomita zaidi ya 20 kutafuta huduma ya kujifungua,” alisema Mkurugenzi Sajidu kwa msisitizo mbele ya wakazi waliokuwa wamejitokeza kwa shauku kubwa kushuhudia ziara hiyo.

Kwa miaka mingi, wakazi wa Ifinga wamekuwa wakikabiliwa na changamoto ya ukosefu wa huduma za afya karibu na makazi yao, jambo ambalo limeathiri kwa kiasi kikubwa ustawi wa afya za jamii. Kukamilika kwa zahanati hiyo kunatarajiwa kupunguza msongamano kwenye vituo vya mbali na kuimarisha huduma ya mama na mtoto katika eneo hilo la pembezoni.
Zahanati ya Ifinga si tu jengo la matofali na bati, bali ni alama ya mabadiliko na tumaini jipya kwa wananchi wa Madaba. Kupitia usimamizi madhubuti wa serikali ya wilaya, dira ya maendeleo ya afya inazidi kuchora ramani ya maisha bora kwa wananchi wa Ruvuma. Ifinga sasa inasubiri kwa hamu tu sauti ya daktari na vishindo vya huduma bora — mapambazuko mapya kwa afya ya jamii.