SERIKALI yatoa milioni 500 kuboresha kituo cha afya Muhukuru Songea

Imewekwa kuanzia tarehe: July 11th, 2020

SERIKALI ya Awamu ya Tano imetoa jumla ya shilingi milioni 500 kuboresha kituo cha afya Muhukuru kilichopo wilayani Songea mkoani Ruvuma.

Akitoa taarifa ya utekelezaji wa uboreshaji wa kituo hicho Mganga Mfawidhi wa kituo  Dr.Denis Mhagama amesema fedha hizo zilipokelewa katika mwaka wa serikali 2017/2018 na kwamba kazi  ya ujenzi ilikamilika Machi mwaka huu.

Ameyataja majengo ambayo yamekamilika kuwa ni jengo la upasuaji,maabara,jengo la kuhifadhia maiti,nyumba ya mtumishi na wodi ya mama na mtoto.

Dr.Mhagama amezitaja huduma zinazotolewa katika kituo hicho kuwa ni matibabu ya wagonjwa wa nje,matatibu ya wagonjwa wa ndani,huduma ya mama na mtoto,upimaji wa VVU na ushauri nasaha.

Amezitaja huduma nyingine kuwa  ni kliniki ya watu wanaoishi na maambukizi ya virusi  vya UKIMWI,uchunguzi wa viashiria vya saratani ya shingo ya kizazi kwa akinamama,matibabu ya kifua kikuu na ukoma na huduma za upasuaji hasa kwa akinamama wenye uzazi pingamizi.

Naye Waziri wa Nchi Ofisi ya Waziri Mkuu, Sera,Bunge,Kazi,Vijana,Ajira na Watu wenye ulemavu Jenista Mhagama ameishukuru serikali  na Ubalozi wa Japan kwa kutoa fedha za kuboresha kituo cha  afya Muhukuru.

Amesema kituo hicho kinahudumia kata tatu za Halmashauri ya Wilaya ya Songea ambazo ni Lilahi,Muhukuru na Ndongosi na kwamba  kituo hicho pia kinatoa huduma kwa baadhi ya maeneo ya wilaya ya Nyasa na nchi jirani ya Msumbiji.

“Kukamilika kwa majengo haya kumewezesha kuokoa kwa kiasi kikubwa vifo vya akinamama wajawazito na watoto wachanga,ambavyo vingeweza kutokea kutokana na umbali wa kituo na hospitali ya Mkoa’’,alisema.

Naye Mkurugenzi wa Halmashauri  ya Wilaya ya Songea Simon Bulenganija amesema katika uboreshaji wa kituo hicho Halmashauri imechangia sh.milioni 28.2 na kwamba upatikanaji wa dawa na vitendanishi katika kituo ni zaidi ya asilimia 90 kwa walengwa wapatao 20,620.

Kituo cha Afya Muhukuru kipo umbali wa kilometa 80 kutoka makao makuu ya Halmashauri ya Songea,kikiwa na watumishi 25 wa kada mbalimbali.

Imeandikwa na Albano Midelo

Afisa Habari Mkoa wa Ruvuma

Julai 10,2020