HOSPITALI ya Tunduru yaboreshwa baada ya miaka 90 ya huduma

Imewekwa kuanzia tarehe: May 23rd, 2025

Hospitali ya Wilaya ya Tunduru mkoani Ruvuma ni moja ya hospitali kongwe nchini Tanzania, iliyojengwa mwaka 1930. Kwa karibu  karne moja, hospitali hii imekuwa nguzo muhimu ya huduma za afya kwa wakazi wa Wilaya ya Tunduru na maeneo jirani katika Mkoa wa Ruvuma. 

 Serikali ya Awamu ya Sita inayoongozwa na Rais Dkt. Samia Suluhu Hassan imefanya juhudi kubwa za kuboresha miundombinu na huduma za hospitali hii.

Katika mwaka wa fedha wa 2024/2025, serikali ilitoa kiasi cha shilingi milioni 900 kwa ajili ya ukarabati wa baadhi ya majengo ya hospitali hiyo pamoja na ununuzi wa vifaa tiba. Ukarabati huu ulijumuisha majengo muhimu kama vile jengo la wagonjwa wa nje (OPD), maabara, na jengo la upasuaji.

Uboreshaji huu umeongeza uwezo wa hospitali katika kutoa huduma bora za afya kwa wananchi wa Tunduru. Kwa mfano, jengo jipya la wagonjwa wa dharura limejengwa na vifaa tiba vya kisasa vimefungwa, ikiwa ni pamoja na vifaa vya upasuaji na maabara. Hii imewezesha hospitali kutoa huduma za afya kwa ufanisi zaidi na kwa wakati, na hivyo kuboresha afya ya jamii kwa ujumla