NYASA wazindua mradi wa maji wa bilioni 3.7

Imewekwa kuanzia tarehe: January 31st, 2025

Wakala wa Maji na Usafi wa Mazingira Vijijini (RUWASA) Wilaya ya Nyasa mkoani Ruvuma umetambulisha mradi mkubwa wa maji wenye thamani ya Tsh Bilioni 3.7. Mradi huu unalenga kutatua changamoto ya maji safi na salama katika Kata za Kilosa na Mbamba Bay, ukihusisha ujenzi wa miundombinu muhimu kama matenki, mabomba na vituo vya kuchotea maji.

Katika mkutano wa hadhara uliofanyika katika Ofisi ya Mtendaji wa Kijiji cha Nangombo, Mkuu wa Wilaya ya Nyasa, Mh. Peres Magiri, alimtaka mkandarasi kuhakikisha mradi unajengwa kwa ubora na unakuwa endelevu ili fedha za serikali ziendane na thamani halisi ya mradi. 

Meneja wa RUWASA Wilaya ya Nyasa, Mhandisi Masoud Samila, alimtambulisha mkandarasi RJ MUSSA CONSTRUCTION LTD kutoka Dodoma na kueleza kuwa mradi unatarajiwa kukamilika Januari 23, 2026. 

Amesema Mradi huo utawanufaisha wananchi 13,323 kutoka vijiji vya Nangombo, Likwilu, Ruhekei, Kilosa, na Mbamba Bay.

Amezitaja Shughuli zitakazotekelezwa ni pamoja na ujenzi wa tenki lenye ujazo wa lita milioni moja, ulazaji wa bomba kuu wa kilomita 2.73, usambazaji wa mabomba kilomita 40.6, na ujenzi wa vituo 10 vya kuchotea maji. Lengo kuu ni kupunguza magonjwa ya mlipuko na kuboresha huduma za maji safi na salama kwa jamii.

Mbunge wa Jimbo la Nyasa, Mhandisi Stella Manyanya, alisisitiza umuhimu wa ushirikiano wa wananchi katika utekelezaji wa mradi huu.