RC RUVUMA akagua miradi wa maji wa bilioni 145

Imewekwa kuanzia tarehe: January 28th, 2025

Mkuu wa Mkoa wa Ruvuma, Kanali Ahmed Abbas , amefanya ukaguzi wa maendeleo ya utekelezaji wa mradi wa maji wa Miji 28 katika mji wa Songea.

Mradi huu unatekelezwa kwa gharama ya shilingi bilioni 145.77 na unalenga kuongeza upatikanaji wa maji safi na salama kwa wakazi wa eneo hilo.

Kanali Abbas ametoa wito kwa Mkandarasi kuhakikisha kazi inaendelea bila kusimama.

Amehimiza kutumia vyanzo vingine vya fedha ili kuhakikisha ujenzi unasonga mbele kwa ufanisi.

“Mkandarasi anapaswa kufanya kazi usiku na mchana ili kuhakikisha wananchi wanapata maji safi na salama kwa haraka,ni muhimu mradi huu ukamilike kwa ubora na ufanisi wa hali ya juu,” alisema Kanali Abbas

Akitoa taarifa kuhusu maendeleo ya mradi huo, Mhandisi Vicent Bahemana kutoka Mamlaka ya Maji Safi na Usafi wa Mazingira Songea (SOUWASA) amesema kuwa ujenzi huo unahusisha ujenzi wa miundombinu ya maji kutoka Mto Njuga, uliopo kijiji cha Kikunja katika Halmashauri ya Wilaya ya Songea.

Amesema mradi huo unatarajia kuongeza uzalishaji wa maji hadi lita milioni 17 kwa siku, hatua hali ambayo itasaidia kupunguza tatizo la upatikanaji wa maji katika mji wa Songea.

Mkurugenzi wa SOUWASA Mhandisi Patrick Kibasa amesema mradi huo huu unajumuisha ujenzi wa matenki matatu yenye uwezo wa kuhifadhi lita milioni 9 za maji pamoja na usambazaji wa bomba za maji umbali wa kilomita 34.7.

Mradi wa Miji 28 unatekelezwa na kampuni ya China Civil Engineering Construction Corporation (CCECC). Hadi sasa utekelezaji wake umefikia asilimia tano.