SERIKALI ilivyodhamiria kugeuza sanaa kuwa bidhaa adimu

Imewekwa kuanzia tarehe: November 5th, 2023

 Waziri wa Utamaduni, Sanaa na Michezo  Dkt.Damas Ndumbaro  amesema Wizara yake imejipanga kubadilisha kazi za sanaa, utamaduni na michezo kuwa miongoni mwa bidhaa adimu.

 Dkt. Ndumbaro amesema hayo wakati anazungumza kwenye   tamasha  la kabila la  wamatengo lililofanyika hivi karibuni katika  kijiji cha Mtama, kata ya Utiri Halmashauri ya Mji wa Mbinga mkoani Ruvuma.

Dkt.Ndumbaro amesisitiza kuwa  kazi za ubunifu zikiwekwa vizuri zitakuwa ni chanzo cha mapato na kukuza uchumi wa  wasanii na Taifa kwa ujumla.

Amesisitiza kuwa Wizara yake  inatarajia kufanya tamasha kubwa la utamaduni katika mkoa wa Ruvuma ambalo litafanyika mwakani  kwenye uwanja wa Majimaji  mjini Songea.

"Tumejipanga kuwatafutia soko kubwa la kimataifa wabunifu wanaosuka visonjo , vikapu  na sanaa nyingine za mikono ili wafaidike na kazi wanazozifanya," alisema Mhe. Dkt. Ndumbaro.