SERIKALI yatoa bilioni 12 kwa ajili ya TASAF Ruvuma

Imewekwa kuanzia tarehe: February 1st, 2025

SERIKALI ya Awamu ya Sita, kwa kushirikiana na wadau mbalimbali, inaendelea kutoa fedha  kwa ajili ya Mfuko wa Maendeleo ya Jamii (TASAF).

Mkuu wa Wilaya ya Songea, Mheshimiwa Kapenjama Ndile,akifungua kikao cha tathmini ya mpango wa kunusuru kaya maskini (TASAF) kwa wataalam wa ngazi ya Mkoa, Wilaya, na Halmashauri, kilichofanyika katika ukumbi wa Heritage Cottage mjini Songea, amesema Mkoa wa Ruvuma umepokea zaidi ya shilingi bilioni 12 kwa mwaka 2024 kwa ajili ya TASAF

Akizungumza kwa niaba ya Mkuu wa Mkoa wa Ruvuma, Ndile alieleza kuwa fedha hizo zinalenga kusaidia kaya maskini kuongeza kipato, kupata fursa za kiuchumi, na kuboresha maisha yao kupitia uwekezaji kwa watoto ili kuhakikisha wanapata elimu na maarifa ya kujikwamua kiuchumi.

Amesisitiza umuhimu wa kuzingatia miongozo ya serikali ili kuhakikisha fedha hizo zinasimamiwa ipasavyo na kuleta matokeo chanya kwa wananchi.

Naye Mratibu wa TASAF Mkoa wa Ruvuma, Xsaveria Mlimira, alifafanua kuwa kati ya Januari na Desemba 2024, kaya 47,721 zimeendelea kunufaika na mpango huo, huku kaya 18,912 zikiwa zimehitimu.

Amesema Mpango huo sasa uko katika awamu ya pili ya utekelezaji na unahusisha vijiji na mitaa 85 kutoka Wilaya zote za mkoa.

Kwa upande wa wanufaika, Regina Komba ameushukuru mpango wa TASAF kwa kumwezesha kuwasomesha watoto wake, jambo ambalo asingeliweza kufanya bila msaada huo.

Suzan Komba, mnufaika mwingine, alisema kupitia mpango huo ameweza kuanzisha miradi ya ufugaji wa kuku na nyuki, ambayo imemsaidia kuendesha maisha yake kwa uhakika