SONGEA ilivyodhamiria wanafunzi wote waliofaulu kidato cha kwanza kuripoti shuleni

Imewekwa kuanzia tarehe: February 7th, 2024

Kaimu Mwenyekiti wa Halmashauri ya wilaya ya Songea mkoani Ruvuma  Mheshimiwa Simon Kapinga amewataka madiwani wa Halmashauri hiyo kuwahamasisha Wazazi  na walezi kuhakikisha Watoto wote wanaostahili wanakwenda shuleni.

Kapinga ameyasema hayo wakati anazungumza kwenye Kikao cha robo ya pili cha Baraza la Madiwani  la Halmashauri hiyo kilichofanyika Lundusi mji mdogo wa Peramiho wilayani Songea.

“ kuna wanafunzi wamefaulu masomo yao ya kujiunga na kidato cha kwanza lakini  mpaka sasa hawajaripoti mashuleni,madiwani wenzangu tushirikiane na  watendaji wa kata,vijiji na wazazi kuhakikisha Watoto wote wanaripoti shuleni”,alisisitiza Kapinga. 

Mwenyekiti huyo pia amekemea tabia ya baadhi ya  wananchi wenye mashamba kuwatumikisha Watoto kwenye ajira mashambani hali ambayo inaathiri  ratiba za masomo yao ambapo ametaka tabia hiyo iachwe mara moja.

Kwa upande wake Mkurugenzi wa Halmashauri ya Wilaya ya Songea Neema Maghembe amesema ofisi yake  kupitia Idara za Elimu Msingi na Sekondari inaendelea kusimamia mahudhurio ya wanafunzi wa awali,msingi na sekondari ili kuhakikisha wanafunzi wote walioandikishwa na waliopangiwa kidato cha kwanza wanaripoti kwa asilimia 100.

Amesema hadi kufikia Januari 31 mwaka huu wanafunzi wa awali katika shule za Halmashauri hiyo walikuwa wameripoti kwa asilimia 99,darasa la kwanza asilimia 99 na wanafunzi wa kidato cha kwanza  wameripoti kwa asilimia 81.2

Hata hivyo Mkurugenzi huyo amewapongeza  watumishi na wataalam  wakiwemo wakuu wa divisheni na vitengo katika Halmashauri hiyo, kwa kazi nzuri ambazo wamekuwa wakifanya, huku akisisitiza kuendelea kuchapa kazi kwa tija na ufanisi.

Halmashauri ya wilaya ya Songe ani miongoni mwa  Halmashauri nane zinazounda Mkoa wa Ruvuma