AMEUONA Mwenge Songea baada ya miaka 63 ya Uhuru

Imewekwa kuanzia tarehe: May 14th, 2025

Na Albano Midelo

Kwa miaka 89 ya maisha yake, Mzee Mohamed Saidi wa Kata ya Matogoro, Manispaa ya Songea mkoani Ruvuma ameshuhudia mengi:Lakini jambo moja muhimu la kihistoria lilikuwa halijawahi kutia mguu kwenye macho yake—Mwenge wa Uhuru.

“Nimekuwa nikiusikia tu kwenye redio,kuuona kwenye picha na kuwaona wengine wakisherehekea, lakini sikuwahi kuushuhudia kwa macho yangu,” anasema kwa sauti ya upole lakini yenye msisimko, akiwa amevaa kofia yake ya zamani aliyoinunua mwaka 1972

. “Leo, hatimaye, nimeuona hapa kwangu. Sikuamini kama nitaishi hadi kuuona.”

Ni Mei14  2025. Mwenge wa Uhuru umefika Manispaa ya Songea, na moja ya sehemu zilizoguswa kwa hisia kubwa ni Bonde la Timamu, ambapo kiongozi wa mbio hizo kitaifa  Ndugu Ismail Ali Ussi amezindua mradi wa kisima cha maji asilia kilichoboreshwa—kisima ambacho kina historia ndefu kama ya Mzee Mohamed mwenyewe.

Kisima hicho, kilichojulikana na wakazi kama “chemchem ya maisha”, kimekuwa chanzo kikuu cha maji kwa wakazi wa Matogoro tangu mwaka 1950. 

Kwa sasa, kutokana na juhudi za Serikali katika Manispaa ya Songea kwa usimamizi wa Mkurugenzi Wakili Bashir Muhoja, kisima hicho kimeboreshwa kwa gharama ya shilingi milioni 23.9 na kunufaisha zaidi ya kaya 500.

“Maji haya sasa ni salama zaidi, yanapatikana kwa urahisi na yanaheshimu hadhi ya mwananchi,” anasema Mkurugenzi Muhoja. “Hiki ni chanzo asilia lakini sasa kimewekewa miundombinu ya kisasa ili kuhakikisha wananchi wa Matogoro hawanyimiwi huduma ya msingi ya maji.”

Lakini jambo kubwa zaidi si tu maji, bali moyo wa ukarimu na uzalendo wa Mzee Mohamed. Eneo la kisima hicho, lenye thamani kubwa kwa sasa, alilikabidhi kwa Serikali bila kudai fidia yoyote.

“Nilifikiri, kama nisipotoa hiki kwa ajili ya jamii, nini kingine cha maana nitakachowacha?” anauliza kwa unyenyekevu. “Nimeishi hapa maisha yangu yote. Maji haya yamenilea, nimeoga hapa, watoto wangu wamecheza hapa. Sasa ni zamu ya kizazi kijacho kufaidika.”

Ujio wa Mwenge wa Uhuru haukuwa tu tukio la kitaifa, bali hadithi ya maisha ya mtu mmoja aliyesubiri kwa miongo sita kuuona. Na zaidi ya hapo, ni hadithi ya kuunganishwa kwa historia ya mtu binafsi na historia ya taifa, kupitia kisima kimoja—kisima cha Timamu.

Katika Bonde la Timamu, maji yanatiririka, Mwenge unawaka, na sauti ya Mzee Mohamed inasikika—sauti ya kizazi kilichotoa, kisicholalamika, kimeonesha upendo wa dhati kwa jamii.