HALMASHAURI ya Mbinga Mji ilivyodhamiria kupunguza changamoto ya lishe duni shuleni

Imewekwa kuanzia tarehe: April 26th, 2024

Kaimu Mkurugenzi wa Halmashauri ya Mji wa Mbinga mkoani Ruvuma Dkt. Kung’e Nyamuryekung’e  amesisitiza umuhimu wa kuongeza idadi ya shule zinazotumia unga ulioongezwa virutubishi ili kukabiliana na changamoto ya utapiamlo na udumavu.

Akizungumza  kwenye kikao cha Kamati ya Lishe ya Halmashauri hiyo, Dkt. Nyamuryekung’e amesema   matumizi ya unga wa virutubishi huo  katika shule hauridhishi.

Kutokana na hali hiyo amewaagiza maafisa elimu na maafisa lishe kushirikiana katika utoaji wa elimu kuhusu umuhimu wa kutumia unga ulioongezwa virutubishi.

“Wakazi wa Halmashauri ya Mji wa Mbinga wapewe elimu kuhusu uwepo wa mashine zinazoongeza virutubishi kwenye unga na umuhimu wa matumizi ya unga huo,” alisisitiza Dkt. Nyamuryekung’e.

Kwa upande wake Afisa Lishe wa Halmashauri ya Mji wa Mbinga  Gloria Maya amesema watashirikiana na Idara ya Viwanda na Biashara ya Halmashauri pamoja na watendaji wa kata kuhakikisha wanafunzi na jamii kwa ujumla wanatumia unga ulioongezwa virutubishi.