KAMATI ya Ulinzi na Usalama Mkoa wa Ruvuma yakagua eneo la Chiwindi mpakani mwa Tanzania na Msumbiji

Imewekwa kuanzia tarehe: May 15th, 2020

MKUU  wa Mkoa wa Ruvuma Christina Mndeme amefanya ziara ya kushitukiza  katika Kijiji cha Mtupale kilichopo mpakani mwa Tanzania na Msumbiji iliyolenga mapambano dhidi ya corona.

Akizungumza jana na wananchi wa kijiji hicho,kilichopo katika Kata ya Chiwanda Halmashauri ya Nyasa, Mndeme awapongeza  wananchi hao namna wanavyopambana na Ugonjwa wa homa ya mapafu ya Corona  kwa kuzingatia taratibu zinazoendelea kutolewa na Serikali. 

Amewaagiza  wananchi  uvaaji wa barakoa kwamba wanaweza kujitengenezea kwa gharama nafuu na rahisi kwa kila mwananchi  kwa kujishonea  ili kupambana na homa ya covid 19.

Hata hivyo Mndeme amewataka Wananchi kuendelea  kufanya kazi za kiuchumi na kijamii ili kujipatia kipato  katika mahitaji ya kila siku kama alivyoagiza Rais kwamba kila mwananchi achape kazi.

“Sisi Rais wetu kwa mapenzi mema,ameruhusu watanzania tuendelee kufanya kazi ili kupata ridhiki za kila siku,chakula cha kila siku kwa hiyo tufanye kazi wakati huo tukiendelea kuchukua tahadhali.’’,alisema Mndeme.

Mkuu wa Mkoa pia amewaomba wananchi kutoa taarifa kwa wageni wanaoingia na kutoka katika nchi ya Tanzania ili wawekwe kalantini  kwa siku 14 na kwamba wasifikiri kalantini kama ni adhabu bali ni  tahadhari itakayosaidia   kupunguza  maambukizi ya virusi vya  Corona.

Mkoa wa Ruvuma ni miongoni mwa mikoa nchini iliyothibitika na Wizara ya Afya kuwa na wagonjwa wa corona.

Imeandikwa na Aneth Ndonde

Ofisi ya Habari Mkoa wa Ruvuma

Mei 15,2020