MAAFISA Elimu watu wazima Ruvuma waagizwa kusimamia madarasa ya Kisomo na SEQUIP

Imewekwa kuanzia tarehe: October 2nd, 2024

MAAFISA Elimu Watu Wazima katika Halmashauri zote mkoani Ruvuma  wameagizwa  kuhakikisha wanasimamia uwepo wa madarasa ya kisomo na SEQUIP  katika kila Kata.

Agizo hilo limetolewa na Mkuu wa Mkoa wa Ruvuma Kanali Ahmed Abbas Ahmed katika  hotuba iliyosoma kwa niaba yake na Katibu Tawala wa Mkoa wa Ruvuma Mary Makondo katika kilele cha maadhimisho ya  Juma la Elimu kimkoa ambayo yamefanyika Mbambabay wilayani Nyasa.

 “Niwaombe wananchi kujiunga kwa wingi katika madarasa hayo kama ilivyo dhamira ya Rais wetu Dkt.Samia Suluhu Hassan  kuhakikisha kila kijana wa kike aliyekatisha masomo anarejeshwa shuleni’’,alisisitiza Kanali Abbas.

Kupitia maadhimisho hayo,Mkuu wa Mkoa amewaagiza wakurugenzi wote wa Halmashauri na maafisa Elimu Msingi na Sekondari wahakikishe kuwa  elimu ya watu wazima inatiliwa mkazo kwa kuweka mikakati mizuri ili iweze kutekelezwa kikamilifu.

Akitoa taarifa ya utekelezaji wa shughuli za elimu ya watu wazima na elimu nje ya mfumo rasmi kwenye maadhimisho hayo,Afisa elimu Ofisi ya Mkuu wa Mkoa wa Ruvuma Mwl.Mathias Tilia  amesema Mkoa kwa kushirikiana na Taasisi ya elimu Tanzania unatekeleza program kwa wasichana waliokatisha masomo ya sekondari ambapo hadi sasa jumla ya wanafunzi 228 wananufaika na mradi huo.

Tilia amesema Mkoa wa Ruvuma una jumla ya vituo  70 vya elimu ya msingi kwa Watoto walioikosa (MEMKWA) vyenye jumla ya wanafunzi 317 kati yao wavulana 231 na wasichana 186 na kwamba wanafunzi hao walikosa fursa ya kupata elimu katika mfumo rasmi kutokana na changamoto mbalimbali za kimaisha.

Ameongeza kuwa Mkoa wa Ruvuma una vituo vitano vya ufundi stadi ambavyo hutoa mafunzo kwa wanafunzi waliomaliza elimu ya msingi na sekondari  katika fani za useremala,ushoni,udobi na upishi na kwamba vituo hivyo vinawapa ujuzi wa stadi mbalimbali vijana ili kuwawezesha kukabiliana na changamoto za kimaisha.

Naye Mkuu wa Wilaya ya Nyasa Mheshimiwa Peres Magiri akizungumza kwenye maadhimisho hayo yenye kaulimbiu ya ujumuishi katika elimu bila ukomo kwa ujuzi,ustahimilivu,amani na maendeleo,amesisitiza  wananchi kuendelea kupata elimu  kupitia mfumo usiokuwa rasmi kwa kuwa elimu haina mwisho.