MADABA waanza kuchimba makaa ya mawe

Imewekwa kuanzia tarehe: November 5th, 2023

KAMPUNI ya Tuteinkwa Investment  Company LTD imeanza kuchimba Makaa ya Mawe katika kijiji cha Mtyangimbole Kata ya Mtyangimbole Halmashauri  ya Madaba wilaya ya Songea mkoani Ruvuma

 Meneja wa Kampuni hiyo Ezekia Makame amesema hadi  sasa wamechimba tani 5,000 ambapo mwisho wa mwezi huu  Novemba  2023 wanatarajia kusafirisha makaa hayo mara baada ya ukamilishaji wa Barabara inayotoka katika mgodi huo na kufika katika Barabara kuu ya Songea -Njombe.

Hata hivyo Makame amempongeza Mkurugenzi wa Halmashauri ya Wilaya ya Madaba Sajidu Idrisa Mohamaed kwa kutoa ushirikiano katika  kampuni hiyo kuanzia  utafiti hadi kufikia kuanza uchimbaji wa Makaa ya Mawe.

Mkuu wa Wilaya ya Songea Mheshimiwa Kapenjama Ndile ametembelea eneo la mgodi,  ambapo ameipongea  Kampuni hiyo kwa kuanza zoezi la uchimbaji na upanuzi wa Barabara yenye kilomita 35 ambayo pia itawasaidia wananchi katika shughuli zao za uchumi.

Mkuu wa Wilaya amehaidi kutoa ushirikiano katika utatuzi wa changamoto zilizobaki ikiwemo Barabara na kuhakikisha  makaa hayo ya Mawe yanaanza kusafirishwa kwa wakati.