MKUU wa Mkoa wa Ruvuma aagiza Kampuni ya madini kulipa deni la milioni 274

Imewekwa kuanzia tarehe: September 4th, 2020

MKUU wa  Mkoa wa Ruvuma Christina Mndeme ameiagiza kampuni ya uchimbaji makaa ya mawe ya Market Insight Limited  kuanza kazi mara moja ya uchimbaji katika kata ya Ruanda wilayani Mbinga.

Kampuni hiyo ilisimamisha kazi ya uchimbaji tangu Desemba 2019 kutokana na mgogoro  baina ya wabia wa uchimbaji wa madini hayo hali iliyosababisha Mkuu wa Mkoa wa Ruvuma kuunda Tume ya uchunguzi wa mgogoro huo iliyofanyakazi kwa siku 14.

Akitoa maagizo hayo kwa wadau wa madini mbele ya waandishi wa habari ofisini kwake mjini Songea Mndeme ameuagiza uongozi wa Kampuni hiyo kuanza uzalishaji wa makaa ya mawe kuanzia Septemba 4,2020 na kuhakikisha wanalipa madeni yote wanayodaiwa na serikali.

“Mnadaiwa mrabaha wa zaidi ya shilingi milioni 274,deni hili lilipwe mara moja kuanzia leo, na deni la kodi ya huduma mnalodaiwa na Halmashauri lilipwe mara moja’’,amesisitiza.

Mndeme pia ameagiza madeni mengine ya kodi ambayo Kampuni hiyo inadaiwa  na Mamlaka ya Mapato Tanzania TRA yalipwe kuanzia sasa na ameagiza Mhandisi wa Madini  wa Kampuni ya Market Insight Limited Fredrick Mwaipopo ambaye anatuhumiwa kukimbia na shilingi milioni 62 za mishahara ya watumishi wa mgodi atafutwe ili kujibu tuhuma hizo.

Mkuu wa Mkoa ameiagiza kampuni hiyo kuanza kuuza makaa ya mawe kwenye viwanda vya ndani ili kupata nishati ya kutosha na ziada inayobaki isafirishwe kwenda nje ya nchi.

Mndeme pia ameagiza  Kampuni hiyo kutoa ajira kwa Watanzania, kuchimba makaa ya mawe yenye viwango ili soko lipanuke, na kuzingatia afya za watumishi wote wanaofanya kazi katika mgodi huo  na usalama wa mazingira ya mgodi huo.

Mkuu wa Mkoa amewaasa wasimamizi wa mgodi huo kutokuwa na migogoro na kwamba wanapotofautiana wamalizane wao kwa kwao chini ya usimamizi wa Afisa madini  wa Mkoa .

Kwa upande wake Mkuu wa Wilaya ya Mbinga Cosmas Nshenye ameutaka uongozi wa kampuni hiyo kutekeleza maagizo yote ya serikali yaliyotolewa na Kamati ya Ulinzi na Usalama ya Wilaya, ikiwemo kupima afya ya watumishi wanaofanya kazi katika mgodi huo,kuwapatia vifaa vya usalama kazini vikiwemo Barakoa na buti.

Naye Kaimu Afisa Madini Mkazi wa Mkoa wa Ruvuma Jumanne Mohamed Nkana  ameahidi kutekeleza maagizo yote yaliyotolewa na Mkuu wa Mkoa wa Ruvuma ambapo ameitaka  Kampuni ya Marketi Isight Limited kutekeleza maagizo hayo na kwamba wakiendelea na migogoro watachukuliwa hatua ikiwemo kunyang’nywa leseni za uchimbaji wa madini.

Imeandaliwa na Aneth Ndonde na Farida Mussa

Ofisi ya Habari ya Mkoa wa Ruvuma

Septemba 4, 2020.