MKUU wa Mkoa wa Ruvuma ataja mafanikio ya mwaka mmoja wa Rais Samia

Imewekwa kuanzia tarehe: March 30th, 2022

SERIKALI imetoa shilingi billioni 323.4 kukamilisha ujenzi wa barabara ya Namtumbo hadi Tunduru Mangaka yenye urefu wa kilomita 324.6 kwa kiwango cha lami.

Hayo yamesemwa  leo na Mkuu wa Mkoa wa Ruvuma Brigedia Generali Wilbert Ibuge wakati  anataja mafanikio ya mwaka mmoja wa serikali ya Awamu ya Sita mbele ya waandishi wa habari ofisini kwake  Mjini Songea.

Amesema Serikali imetoa pesa kiasi cha Bilioni 129.3 kwa ajili ya kukamilisha ujenzi wa barabara ya Mbinga hadi Mbambabay yenye urefu wa kilomita 66 kwa kiwango cha lami.

‘’Niwajulishe pia wananchi wa Mkoa wa Ruvuma Mkoa umepokea jumla ya shilingi Bilioni 14,164,104,629.07 kutoka mfuko wa barabara na Tozo kwa ajili ya ujenzi wa barabara za lami mjini, madaraja 28, makalvati 161, matengenezo ya kawaida km 361.52, muda maalumu km 172.11 na maeneo korofi km 108.4’’, amesema RC Ibuge.

RC Ibuge amesema kukamilika kwa ujenzi wa daraja la mto  Ruhuhu lenye urefu wa mita 98.01 limegharimu shilingi Bilioni 6.172  ambalo linaungani Mkoa wa Ruvuma na maeneo yake yote yaweze kufikiwa kwa urahisi.

Hata hivyo amesema kiasi cha fedha Bilioni 37.09 zimetumika kwa ajili ya ujenzi na upanuzi wa kiwanja cha Ndege Songea mjini.

Amesema kiasi cha shilingi Bilioni 6.57 zimetumika kukamilisha ujenzi wa stendi ya kisasa ya mabasi katika Manispaa ya Songea.

Akizungumza katika kikao  hicho RC Ibuge ameongeza kuwa ujenzi wa bandari  mpya ya Ndumbi katika wilaya ya Nyasa unaendelea kwa gharama ya shilingi Bilioni 12.28.

Tutaendelea kuwaletea mafanikio ya mwaka mmoja wa  serikali  ya awamu ya sita  katika Mkoa wa Ruvuma yaliyotajwa na Mkuu wa Mkoa wa Ruvuma  katika habari zinazofuatia kupitia tovuti yetu.

Imeandaliwa na Bahati Nyoni 

Kutoka Kitengo cha Mawasiliano Serikalini Ofisi ya Mkuu wa Mkoa wa Ruvuma 

Machi 30 2022.