MWENGE wa Uhuru wazindua jengo la kutolea huduma za dharura Tunduru

Imewekwa kuanzia tarehe: June 8th, 2024

Mwenge wa Uhuru 2024 umezindua jengo la kutolea huduma za dharura (EMD)katika hospitali ya Wilaya ya Tunduru mkoani Ruvuma ambapo serikali imetoa Zaidi ya shilingi milioni 369 kutekeleza mradi huo.

Akitoa taarifa ya mradi huo kwa Kiongozi wa Mbio za Mwenge wa Uhuru Kitaifa,Mkurugenzi Mtendaji wa Halmashauri ya Wilaya ya Tunduru Chizza Marando amesema kati ya fedha zilizotumika shilingi milioni 300  zilitoka serikali kuu kupitia kwa wahisani (IMF)  na Halmashauri ya Wilaya  kupitia mapato ya ndani iliongeza Zaidi ya shilingi milioni 69.

Amesema mradi huo ulikamilika Aprili 2023 na ulianza kutoa huduma rasmi Juni 2023 ambapo hadi sasa jumla ya wateja 1,003 wamepatiwa huduma kupitia mradi huo.

“Faida za mradi huu ni Pamoja na kutoa huduma za dharura kwa wagonjwa wenye matatizo mbalimbali ya kiafya,kupunguza rufaa za matibabu kwa wagonjwa na kupunguza gharama za rufaa kwa hospitali’’,alisema Marando.

Akizungumza kabla ya kuzindua mradi huo,Kiongozi wa Mbio za Mwenge wa Uhuru Kitaifa 2024 Godfrey Mnzava  amesema wamebaini dosari zilizojitokeza kwenye ukaguzi wa mradi huo hivyo  amemuagiza Kamanda wa TAKUKURU Wilaya ya Tunduru kufanya uchunguzi wa matumizi ya shilingi milioni 69  za nyongeza zilizotumika kwenye mradi huo bila utaratibu baada ya kuidhinishwa na Baraza la Madiwani la Halmashauri ya Tunduru.

 Ameongeza kuwa wamebaini baadhi ya malipo katika utekelezaji wa mradi huo yamefanyika bila vocha yake kuwa na risiti ambapo ameagiza kuwepo na uthibitisho wenye  risiti  za kieletroniki.

Mwenge wa Uhuru katika Halmashauri ya Wilaya ya Tunduru  umepitia na kukagua miradi 11 yenye thamani ya shilingi bilioni 4.1