RC Ruvuma ashauri vijana kutumia mabonanza kukuza michezo

Imewekwa kuanzia tarehe: October 23rd, 2024

MKUU wa mkoa wa Ruvuma Kanali  Ahmed Abbas Ahmed ,amewataka wakazi wa mkoa huo hususani vijana kutumia mabonanza mbalimbali ya michezo kuhamasishana na kuelimishana juu ya  umuhimu wa kwenda kujiandikisha kwenye Daftari la orodha la wapiga kura.

Amesema,kujiandikisha kwenye Daftari hilo kutawawezesha kuwa na sifa ya  kupiga kura na kuchagua viongozi bora wanaowataka kwenye uchaguzi wa Serikali za mitaa unaotarajia kufanyika tarehe 27 Novemba mwaka huu.

Kanali Abbas amesema hayo ,wakati akifunga fainali ya mashindano ya Ruvuma vijana (vijana Ruvuma Cup 2024) kati ya Timu ya Bombambili City na Bombambili United  iliyochezwa katika uwanja wa shule ya msingi Sokoine Manispaa ya Songea.

Amesema,vijana wa mkoa wa Ruvuma wanapaswa kutumia mchezo huo kama hamasa ya kuendeleza michezo mingine hasa ikizingatiwa kuwa hivi sasa michezo imesaidia watu wengi kupata ajira.

Amempongeza mwenyekiti wa umoja wa vijana wa Chama cha Mapinduzi Kelvin Challe, kwa ubunifu wake mkubwa wa kuanzisha mashindano hayo yaliyowakutanisha vijana wengi kutoka maeneo mbalimbali ya mkoa wa Ruvuma.

Abbas,amewashukuru wadau waliosaidia kufanikisha  mashindano ya vijana akiwemo Mbunge wa Vijana na Naibu Waziri wa Nishati Judith Kapinga aliyetoa jezi kwa timu zote zilizoshiriki Ligi hiyo.

Kwa upande wake Mwenyekiti wa UVCCM Mkoa wa Ruvuma Kelvin Challe,amewashukuru wananchi waliopata nafasi ya kushiriki Ligi hiyo kuanzia hatua ya awali hadi fainali.

Alisema,jambo la kujivunia mashindano ya mwaka huu yamekuwa yenye  hamasa na mwitikio mkubwa  kwani imeshirikisha jumla ya timu 32  ikilinganisha na msimu uliopita  hasa baada ya kuongezeka kwa zawadi kwa washindi na timu  zote shiriki.