RC RUVUMA awataka wazazi na walezi kuchangia chakula cha mchana kwa watoto wao

Imewekwa kuanzia tarehe: May 21st, 2023

Mkuu wa mkoa,amesema hayo jana wakati akizungumza na wanafunzi,walimu na baadhi ya wazazi wakati wa ziara yake ya kuhamasisha zoezi la upandaji miti katika Manispaa ya Songea mkoani humo.

Amewataka wazazi na walezi kuwa na huruma na kuona umuhimu wa kuanza kuchangia chakula ili kuwawezesha watoto kuwa na usikivu darasani jambo litakalowasaidia kufanya vizuri katika masomo yao.

Alisema,ni jambo lisilovumilika  hata kidogo kuona mkoa wa Ruvuma unaongoza kwa kuzalisha chakula,lakini baadhi ya wazazi wanashindwa kuchangia chakula na hivyo kuwapa wakati mgumu walimu kutafuta chakula kwa ajili ya watoto hao.

Amewataka kubadilika kifkra na kuona aibu kwa kuwa hilo ni jukumu lao na siyo la serikali,hivyo ni lazima wawajibike kwa kuwapatia watoto  wao mahitaji muhimu ikiwemo chakula na mavazi.Aidha,Mkuu wa mkoa amepiga marufuku tabia ya wakulima kuuza mazao hasa mahindi yakiwa bado shambani,badala yake kusubiri hadi soko la uhakika litakapofunguliwa.

Alisema,ana taarifa kwamba wafanyabiashara wameanza kupita mashambani na kuwashawishi wakulima kuwauzia mahindi kwa bei ya Sh.1,000 hadi 1,200 kwa kilo moja ambayo hailingani na gharama ya uzalishaji mashambani.

Amewaonya wafanyabiashara kuacha mara moja tabia hiyo kwani serikali imejipanga kuchukua hatua kali kwa mtu na mfanyabiashara atayekamatwa anawarubuni wakulima ili wauziwe mahindi yakiwa bado shambani.

“ndugu zangu niwaambie mwaka huu mahindi yatakuwa na bei nzuri sana kwani baadhi ya mikoa ikiwemo Lindi,Mtwara,Pwani na Tanga hali ya uzalishaji wa chakula siyo nzuri kutokana na upungufu wa mvua”alisema.

Kwa mujibu wa Mkuu wa mkoa,kutokana na changamoto hiyo mahitaji ya chakula katika maeneo  hayo ni makubwa,na kuwasihi wakulima kuendelea kuvuta subira hadi soko la uhakika litakapofunguliwa.

Kwa upande wake Mkuu wa wilaya ya Songea Wilman Ndile alisema,serikai ya wilaya imejipanga kuhakikisha hakuna mfanyabiashara anayekwenda  mashambani kushawishi wakulima ili auziwe mahindi na mazao mengine yakiwa bado shambani.