SHIRIKA LA Compasion International latoa msaada wa vyandarua 250 kwa watoto wenye mazingira magumu Songea

Imewekwa kuanzia tarehe: July 8th, 2020

 SHIRIKA la Compasion International lenye makao makuu yake jijini Arusha limetoa msaada wa vyandarua 250 vyenye thamani ya shilingi milioni  2.5  kwa Kanisa la Anglikana la Mtakatifu Agustino Mji mwema Dayosisi ya Ruvuma.

 Msaada huo umetolewa kwa watoto wanoaishi katika mazingira magumu ili kujikinga na ugonjwa wa Malaria.

Mchungaji Kiongozi wa Kanisa la Anglikana Mjimwema Padre John Midelo amesema kati ya vyandarua hivyo,kituo cha Mjimwema kipata vyandarua 150 na kituo cha Lupapila kimepata vyandarua 100.

Mgeni rasmi katika hafla ya ugawaji wa vyandarua hivyo alikuwa ni  Meneja wa Benki ya CRDB tawi la Songea  Afrosina Mwanja ambaye amewaasa wazazi na walezi kuwalea watoto katika maadili mazuri kwa sababu watoto hao ni viongozi wa baada.

Mwanja pia amewataka wazazi na walezi kuhakikisha kuwa  vyandarua vilivyotolewa vinatumika kwa watoto na siyo kwa wageni au watu wengine.

,,Akina mama na akina Baba tuwajali watoto tuondokane na mila kwamba tukiweka chakula mezani wale wakubwa mtoto atakula baadae, kunawa mkubwa mtoto anakuwa wa mwisho anakula uchafu hizo ni mila mbaya kwa watoto’’,alisisitiza.

Hata hivyo Mwanja ametoa  rai kwa wazazi kuhakikisha  watoto  wao wanapata haki  zao zote msingi ili waweze kuwa na maisha bora na kujenga taifa lenye maadili .

 Meneja wa CRDB B amechangia kituo hicho kiasi cha  200,000 kila mwezi kuanzia mwezi Juni hadi Desemba 2020 ambako ameagiza  fedha hiyo itumike kwa watoto hao wanaolelewa katika kituo hicho ili kutatua changamoto zao mbalimbali.

Kwa upande wake Meneja wa Benki ya NMB tawi la Songea ambaye alikuwa mgeni rasmi katika hafla ya kugawa vyandarua 100 katika kituo cha Lupapila amewaasa wazazi na walezi kuwajali na kuwasomesha watoto wao ili wapate elimu ambayo ndiyo urithi wa pekee katika maisha yao.

Akizungumza mara baada ya kupokea msaada huo Mchungaji Kiongozi  wa Kanisa hilo Padre John Midelo amelishukuru   shirika la Compasion International linaloshirikiana na Makanisa ya kipentecoste na CCT kulea  watoto katika Nyanja kuu nne Kiroho,Kimwili,Kiakili na kiuchumi.

Amesema watoto hao wanalelewa kuanzia umri wa miaka mitatu hadi sabaambao wanalelewa mpaka kufikia umri wa miaka 22  na kwamba  mtoto atakayeendelea na masomo ya juu ataendelea kufadhiliwa  mpaka chuo kikuu akiwa hajavuka miaka 22.

Padre Midelo amesema shirika hilo limeahidi kutoa bima ya afya watoto hao wanaoishi katika mazingira magumu watapewa bima ya afya na mavazi,vifaa vya shule na chakula.

Hata hivyo amesema  kituo hicho kinakabiliwa na changamoto ya miundo mbinu ambapo hadi sasa watoto wanaosoma idadi yao ni 95 na kwamba wana upungufu wa madarasa  na choo kimejengwa kwa gharama milioni saba lakini bado  ujenzi wake haujakamilika.

Mwenyekiti wa Kamati ya Wazazi Noela chisokole amelipongeza shirika hilo pamoja na makanisa yanayoshirikiana kutoa masaada huo kwa watoto wao,ambapo amesema awali hali ilikuwa ngumu kwa upande wa mavazi,chakula vifaa vya shule na matibabu.

 Imeandaliwa na Aneth Ndonde

Afisa habari kutoka ofisi ya Mkuu wa Mkoa

Ruvuma songea

Julai 8,2020