TAMKO la Kamati ya Mahusiano ya Dini Mkoa wa Ruvuma,kuelekea Uchaguzi Mkuu Oktoba 28

Imewekwa kuanzia tarehe: October 21st, 2020

WATANZANIA wametakiwa kutambua umuhimu wa  kujitokeza kuchagua viongozi ngazi mbalimbali kwenye Uchaguzi Mkuu unaotarajia kufanyika Oktoba 28 mwaka huu.

Rai hiyo imetolewa na Makamu Mwenyekiti wa Kamati ya Mahusiano ya Dini mkoani Ruvuma Shekh Ally Hassan Mahaba,wakati Kamati hiyo inatoa tamko  kuelekea Uchaguzi Mkuu kwa wanahabari   kwenye ukumbi wa Ruhuwiko Hunt Club  mjini Songea.

Shekh Mahaba  ameyataja matamko ya  Kamati ya Dini Mkoa wa Ruvuma kuwa ni kuombea uchaguzi mkuu unaotarajia kufanyika Oktoba 28 mwaka huu na kusimamia amani na upendo wa nchi.

Amesema katika kuhakikisha zoezi la uchaguzi Mkuu linafanyika kwa amani,Kamati ya Mahusiano ya Dini mkoani Ruvuma imeweka utaratibu wa kuombea uchaguzi kwenye misikiti na makanisa siku mbili ambazo ni Oktoba 23 na Oktoba 25 mwaka huu.

“Tumeendelea kusisitiza kwamba,waumini wetu na wasiokuwa waumini   Oktoba 28 mwaka huu,wakishapiga kura warudi nyumbani  kupumzika ,wakisubiri matokeo ’’,alisisitiza Shekh Mahaba.

Makamu Mwenyekiti huyo amesisitiza  kuwa isitokee vurugu baada ya wananchi kupiga kura na kwamba kupiga kura ni suala la siri ambapo ameitaja kazi kubwa ya viongozi wa dini ni kuhubiri upendo,mshikamano,amani,na ushirikiano.

Ametoa rai kwa wasimamizi wa uchaguzi kufanyakazi kwa weledi na kuwasaidia watu wenye mahitaji maalum kama wenye ulemavu ili waweze kujaza fomu zao vizuri kwenye vituo vya kupigia kura.

Amewaasa viongozi wa dini wasijihusishe na kuelekeza waumini kwamba apigiwe kura mgombea Fulani katika kipindi hiki.

Kwa upande wake Katibu wa Kamati ya Mahusiano ya Dini Mkoa wa Ruvuma Alhaj Abdalah Mohamed Ndesai  amesema Kamati  imedhamiria kuhubiri amani na utulivu kila wakati ili Tanzania iendelee kuwa kisiwa na amani.

Amesema nchi inapoingia kwenye uchaguzi Mkuu,viongozi wote wa dini wanapaswa kuwaeleza waumini umuhimu wa kwenda kupiga kura kwa sababu ni haki na Katibu ya nchi inaruhusu kila baada ya miaka mitano kufanya uchaguzi kwa amani na utulivu.

Mackei Mguhi ni Mjumbe wa Kamati ya Mahusiano  ya Dini toka Kanisa la Anglikana,amesema Tanzania imekuwa na amani  kwa miaka yote, hivyo hatutegemei katika uchaguzi wa safari hii mambo kuwa tofauti ambapo amesisitiza viongozi wa dini kuendelea kuhubiri amani na upendo kabla na baada ya uchaguzi.

 Kwa upande wake Mjumbe wa Kamati ya Amani Mkoa wa Ruvuma  Fatuma Misango  ameunga mkono tamko la viongozi wa dini akisisitiza kuwa kila mpigakura anatakiwa kujua wajibu wake wa kwenda kupiga kura na kurudi nyumbani lengo likiwa ni kudumisha amani ya nchi iliyopo.

Amesema hakuna dini yeyote ambayo inahamasisha upotevu wa amani na kwamba amani ikitoweka ni vigumu kuirudisha hivyo ameshauri kufuata sheria za uchaguzi ili kulinda amani na utulivu wa nchi.

Mbwana Said Mjumbe ni Mjumbe toka Baraza la BAKWATA Mkoa wa Ruvuma amewahimiza watanzania kujitokeza kuwachagua madiwani,wabunge na Rais Oktoba 28 mwaka huu na kuendelea kuhamasisha amani na utulivu.

Naye Mjumbe wa Kamati ya Mahusiano ya Dini toka Kanisa la KKKT Songea, Grace Msuya amesema bila amani na upendo Tanzania haitakuwepo hivyo amesisitiza viongozi wa dini na waandishi wa habari kuwa chachu ya kuhubiri amani na utulivu wakati wote.

“Tukifanya kosa kwenye uchaguzi,tujue  tayari tumekosa amani,tusali na tumuombe Mungu atuchagulie viongozi ambao wanastahili ili  kuendeleza Tanzania’’,alisisitiza Msuya.

Imeandikwa na Albano Midelo

Afisa Habari Mkoa wa Ruvuma

Oktoba 21,2020