WANANCHI Ruvuma washauriwa kutunza vyanzo vya maji

Imewekwa kuanzia tarehe: October 16th, 2023

WANANCHI  mkoani Ruvuma wameshauriwa  kulinda misitu na kutunza vyanzo vya maji ili  vyanzo hivyo viwe endelevu kwa kizazi cha sasa na kijacho.

Ushauri huo umetolewa na Afisa Maliasili wa Mkoa wa Ruvuma Afrikanus Challe ambapo amezitaja  baadhi ya changamoto wanazokutana nazo kuwa ni uharibifu wa mazingira na vyanzo vya maji.

Amesema uharibifu huo  kwa kiasi kikubwa unatokana na uchafuzi  katika vyanzo vya maji na kusababisha upungufu wa maji katika vyanzo vingi  hasa wakati wa kiangazi.

Hata hivyo Challe amesema Idara yake, inaendelea kuwaelimisha wananchi kuacha shughuli za kibinadamu karibu na maeneo ya vyanzo vya maji.

“Ili kulinda vyanzo vya maji, Bonde la ziwa Nyasa limefanikiwa kuweka mipaka kwenye vyanzo vinne ambavyo ni jumla ya hekta 43,huduma ya maji na usafi wa mazingira inategemea kwa kiasi kikubwa uendelevu wa vyanzo vya maji ambavyo vinasimamiwa na mabonde”,alisisitiza.

Mkoa wa Ruvuma unategemea maji kutoka katika mabonde matatu ambayo ni  bonde la Nyasa, Ruvuma na Rufiji.

Imeandikwa na Farida Baruti kutoka Kitengo cha Mawasiliano Serikalini Ofisi ya Mkuu wa Mkoa wa Ruvuma