WATAALAM 48 wa Halmashauri Ruvuma waanza mafunzo ya Mfumo mpya wa ununuzi

Imewekwa kuanzia tarehe: August 29th, 2023

WATAALAM 48 kutoka Halmashauri nane za Mkoa wa Ruvuma wameanza mafunzo ya siku tano  ya mfumo mpya wa ununuzi wa umma (NeST) yanayofanyika kwenye ukumbi wa Halmashauri ya mji wa Mbinga.

Mafunzo hayo yaliyoanza Agosti 28,2023 yamefunguliwa na Kaimu Katibu Tawala wa Mkoa wa Ruvuma Ndugu Jumanne Mwankoo.

Mafunzo hayo yanatolewa baada ya timu ya watumishi sita kutoka Sekretarieti ya Mkoa wa Ruvuma kupata mafunzo ya mfumo mpya wa Ununuzi NeST yaliandaliwa na Mamlaka ya Udhibiti wa Ununuzi ya Umma (PPRA) mjini Dodoma na kushirikisha Sektretarieti za mikoa 26 ya Tanzania Bara.

 PPRA imeunda mfumo mpya wa ununuzi wa umma unaoitwa National eprocurement Sytem of Tanzania (NeST) ambao umeanza kutumika Julai Mosi 2023,baada ya kubaini changamoto za kiufundi zilizojitokeza kwenye mfumo wa ununuzi wa awali (TANePS) ambapo Mfumo wa TANePS utakoma rasmi kutumika ifikapo tarehe 30 Septemba 2023 na Mfumo mpya wa NeST kuanza kutumika rasmi Oktoba Mosi 2023.

Faida za mfumo mpya wa ununuzi wa umma kuwa ni Pamoja na kuongeza wigo wa ushiriki kwenye ununuzi,uwajibikaji,kupunguza muda wa mchakato,upatikanaji wa taarifa na kupunguza mianya ya rushwa.

Faida nyingine ni uandaaji wa zabuni zote na uombaji wa zabuni utafanyika ndani ya mfumo,wazabuni watajisajiri na kupandisha nyaraka zao zote kwa mara moja na nyaraka zote zitasainiwa ndani ya mfumo.

Sekta ya ununuzi wa umma inachukua takriban asilimia 70 ya Bajeti ya Serikali hivyo uamuzi wa serikali kuamua kuanza kutumia mfumo wa NeST kutaongeza uwajibikaji kwa watendaji hasa PPRA wanaosimamia mfumo wa ununuzi wa umma.