WAZIRI Mkuu alipongeza kanisa katoliki Jimbo Kuu la Songea kwa mafanikio ya kiroho na kimwili

Imewekwa kuanzia tarehe: October 1st, 2023

Waziri Mkuu  wa Tanzania Mheshimiwa Kassim Majaliwa   amempongeza Askofu Mkuu wa Jimbo Kuu la Songea Mhashamu Damian Dallu kwa kuadhimisha jubilei ya miaka 125.

 Amesema katika kipindi chote hicho kanisa limefanikiwa kuwajenga waumini wake kiimani na kuwaelimisha  namna waumini wanavyoweza kukuza uchumi wa mtu binafsi.

Waziri Mkuu alikuwa anazungumza kwenye kilele cha Jubilei ya miaka 125 ya uinjlishaji wa kanisa katoliki Jimbo Kuu la Songea iliyofanyika Abasia ya Peramiho nje kidogo ya mji wa Songea ambapo Waziri Mkuu alikuwa ni mgeni rasmi

Ameongeza kuwa katika kipindi hicho kanisa limekuwa mstari wa mbele kuunga mkono kwa vitendo jitihada za serikali za kuwaletea wananchi maendeleo kwa kujenga shule,vituo vya afya,viwanda,vituo vya kulelea Watoto yatima,kuanzisha vyuo mbalimbali vya ufundi stadi  na kuanzisha vyuo vikuu ambapo amesisitiza kuwa kazi hiyo imeleta maendeleo makubwa katika ustawi wa jamii.

Awali akizungumza kabla ya Waziri Mkuu kuzungumza Askofu Mkuu wa Jimbo Kuu la Songea Mhashamu Damian Dallu  amesema kanisa  linaadhimisha jubilei ya uinjilishaji iliyoletwa na wamisionari wabenediktini mwaka 1898  likiwa limepata mafanikio makubwa kimwili na kiroho kutokana na  wamisionari wabenediktini kupanda mbegu ya  injili  iliyozaa matunda kwa kipindi cha miaka 125.