BILIONI tatu kumaliza kero ya Maji Naikesi Namtumbo

Imewekwa kuanzia tarehe: February 12th, 2024

Changamoto ya upatikanaji wa maji safi na salama kwa wakazi wa vijiji vya Luhimbalilo,Naikes na Luhangano wilaya ni Namtumbo mkoani Ruvuma inakwenda kumalizika  baada ya serikali kutekeleza mradi wa maji wa zaidi ya bilioni  tatu .

 Wakala  wa Maji na Usafi wa Mazingira Vijijini (RUWASA), imeanza kutekeleza  awamu ya pili ya ujenzi wa mradi mkubwa wa maji wa Luhimbalilo-Naikes utakaowanufaisha wakazi zaidi ya 15,542 katika vijiji  hivyo.

Kaimu Meneja wa RUWASA Wilaya ya Namtumbo Mhandisi Salome Method amesema mradi huo unatekelezwa na Mkandarasi  Kampuni ya Trinity Manufacturing Service Ltd chini ya usimamizi wa RUWASA wilaya ya Namtumbo.

 Amesema  ,mradi huo unatekelezwa kwa awamu mbili  na umetengewa  zaidi  ya Sh.bilioni  3.17 kati ya fedha hizo zaidi ya Sh.bilioni 1.7 zimetumika kutekeleza mradi awamu ya kwanza katika kijiji Luhimbalilo.

Amesema zaidi ya shilingi bilioni 1.46 zitatumika katika awamu ya pili ya mradi.

Kwa mujibu wa mhandisi huyo 

 ,RUWASA wilaya ya Namtumbo imekamilisha ujenzi wa mradi wa maji  wa Masuguru unaohudumia wakazi zaidi ya 3,264 kwa gharama ya  zaidi ya shilingi milioni 350.

Mkazi wa kijiji cha Luhimbalilo Said Juma,ameishukuru serikali kwa kujenga mradi huo kwa kuwa tangu kijiji hicho kilipoanzishwa miaka ya 70 hakijawahi kupata maji ya bomba.