MFUMO wa stakabadhi ghalani wawaingizia wakulima Ruvuma bilioni 87

Imewekwa kuanzia tarehe: May 30th, 2023

WAKULIMA mkoani Ruvuma wameweza kuingiza zaidi ya shilingi bilioni 87 baada ya kuuza mazao ya ufuta,soya,mbaazi,korosho na kahawa kupitia mfumo wa stakabadhi ghalani  katika kipindi cha mwaka 2022/2023.

Hayo yamesemwa na Mkuu wa Mkoa wa Ruvuma Kanali Laban Thomas katika hotuba yake iliyosomwa na Mwakilishi wake Mhe.Kapenjama Ndile kwenye jukwaa la maendeleo ya ushirika Mkoa wa Ruvuma lililofanyika katika ukumbi wa Chandamali mjini Songea.

Kanali Thomas amesema kati ya fedha hizo  wakulima waliuza ufuta tani 7,970 zilizowaingizia shilingi bilioni 5.97 na mbaazi tani 6,647 zilizowaingizia shilingi bilioni 5.21.

Amebainisha zaidi kuwa kupitia mfumo wa stakabadhi ghalani wakulima mkoani Ruvuma,waliuza korosho tani 15,315 zilizowaingizia shilingi bilioni 23.9 na kwamba waliuza kahawa tani 4,856 zilizowaingizia wakulima shilingi bilioni 31.61.

“Natoa wito kwa Halmashauri zote na viongozi katika ngazi zote tuwe na mpango kabambe wa kusimamia mfumo wa stakabadhi ya ghala na wakulima kujiunga na kushiriki kwenye shughuli za kiuchumi za vyama vya ushirika’’,alisisitiza Kanali Thomas.

Amewatahadharisha wadau wa ushirika kutowaruhusu wanaotaka kupindisha sheria  kwa sababu wataua ushirika na kwamba wasiruhusiwe wafanyabiashara au mtu yeyote anayetaka kukwamisha mfumo wa stakabadhi ghalani.

Amesisitiza kuwa serikali ya Tanzania chini ya uongozi wa Rais Dkt.Samia Suluhu Hassan kupitia Ilani ya CCM ya mwaka 2020 hadi 2025 itahakikisha dhana ya ushirika wa hiari inajengwa na kusimamiwa na sheria ili kuwalinda na kuwanufaisha wanaushirika hivyo kuchangia ustawi wa ushirika na Taifa kwa ujumla.

Awali  Stella Msengi akisoma risala ya wanaushirika na wadau wa maendeleo ya ushirika katika Jukwaa la Ushirika wa Mkoa wa Ruvuma, amempongeza Rais Dkt.Samia Suluhu Hassan kwa kufanyia kazi changamoto mbalimbali zilizokuwa zinaikabili jamii kupitia vyama vya ushirika.

Amesema Mkoa wa Ruvuma hadi sasa una jumla ya vyama vya ushirika 293  kati ya hivyo vyama vya ushirika vya akiba na mikopo ni 62,vyama vya  ushirika wa masoko ya mazao 222 vyama vikuu vya ushirika vitatu na vyama vya ushirika vinginevyo sita.

Risala hiyo imeyataja baadhi ya mafanikio ya vyama vya ushirika katika Mkoa wa Ruvuma kuwa ni kuratibu upatikanaji wa pembejeo,kuongeza mnyororo wa thamani ya mazao na bidhaa,kusimamia masoko ya mazao na bidhaa na kusimamia matumizi ya vipimo sahihi vya mauzo ya mazao ya wakulima.

Kwa upande wake Mwenyekiti wa Jukwaa la Maendeleo ya Ushirika Mkoa wa Ruvuma Justine Welo  amesema ushirika ni Taasisi ambayo inapigwa vita na watu wanaotaka kuwanyonya wakulima kwa kuwa ushirika unahusika na mazao ya kimkakati kama kahawa na korosho.

Amesisitiza kuwa katika kipindi cha mavuno kumekuwa na vita ya kugombea mazao hayo hivyo ametoa rai kwa serikali kuweka sheria ya Ushirika  kusimamia mazao ya kimkakati.

Kaulimbiu ya mwaka huu ya Jukwaa la Ushirika ni Ushirika kwa maendeleo endelevu.

Imeandikwa na Albano Midelo wa Kitengo cha Mawasiliano Serikalini Ofisi ya Mkuu wa Mkoa wa Ruvuma

Mei 30,2023