MWENGE wa Uhuru wazindua Mradi wa madarasa mawili wenye thamani ya milioni 40

Imewekwa kuanzia tarehe: September 6th, 2021

MRADI wa Madarasa mawili ya shule ya Msingi Mtyangimbole umezinduliwa na kiongozi wa Mbio Maalumu za Mwenge wa Uhuru Lt Josephine Mwambashi na ametembelea mradi wa lishe pamoja na kukagua banda la Malaria.

Ujenzi wa Madarasa hayo umegharimu fedha kiasi cha shilingi milioni 40 kutoka Serikali kuu na nguvu kazi za Wananchi shilingi milioni 5.5, na kubaki shilingi zaidi ya milioni 4 na kutumika kukarabati madarasa mengine.

Mara baada ya kuzinduliwa kwa Madarasa hayo Kiongozi huyo amesema umuhimu wa madarasa hayo yataongeza ari  ya wanafunzi kupata hamasa ya kujisomea kwa usahihi na amewaagiza wanafunzi kutumia vizuri na wengine wajao watumie.

Mwambashi ameipongeza Halmashauri hiyo kwa kusimamia mradi huo kwa viwango vinavyotakiwa na kuhakikisha kiasi cha fedha zaidi ya shilingi milioni 4 kinabaki na kutumia  kukarabati madarasa mengine ya shule hiyo.

“Gharama za mradi huo tulipokea fedha kutoka Serikali kuu milioni 40 na nguvu ya wananchi ni milioni 5.5, mradi huo umejengwa kwa kutumia force account”.alisema Mkurugenzi wa Halmashauri.

Wakati huo huo katika kuboresha afya ya wananchi Mkurugenzi Mtendaji wa Halmashauri hiyo Sajidu Idrisa Mohamed ameuongea  mradi wa lishe ikiwemo siku ya afya ya Lishe ya kijiji cha Likalangilo,ambayo ni mpango  jumuishi ya kuboresha upatikanaji wa Afya kwa jamii na kuwajengea uwezo wa kutambua jinsi ya kuzuia utapiamlo.

 Amesema Wilaya ya Songea inaendelea kuelimisha wananchi kuhusu lishe bora na umuhimu wa Lishe bora katika familia na jamii kwa ujumla kwa kupitia shughuli mbalimbali ikiwemo klini ya kila mwezi kwa wazazi na walezi wa watoto chini ya miaka mitano,siku za afya za Lishe zinazofanyika kila robo ya mwaka.

Hata hivyo ameelezea wananchi wa Halmashauri ya Mdaba  wanavyoelewa umuhimu wa Lishe na wanaendelea kuwafahamisha juu ya umuhimu wa lishe bora na athali zitokanazo na lishe duni na madhara ya utapia mlo.

Vile vile Mkurugenzi  kwa upande wa Malaria amesema Ugonjwa wa malaria ni miongoni mwa Magonjwa 10 yanayoongoza kuhatarisha  maisha ya jamii katika Wilaya ya Songea.

“Hali ya maambukizi imepungua kwa wastani wa kutoka asilimia 11.5 mwaka 2019  na kufikia asilimia 8.1 mwaka 2021,hii ni kutokana na hatua mbalimbali ambazo zilikuwa zikichukuliwa  na idara ya afya”.

Ameelezea utekelezaji wa kuhakikisha Ugonjwa huo unadhibitiwa kwa matibabu kwa kutumia kanuni na miongozo  ya Wizara ya Afya kwa walewanaobainika wameambukizwa Uganjwa kwa wajawazito wanaoanza kliniki na watoto chini ya miaka mitano.

Imeandaliwa na Aneth Ndonde

Kutoka ofisi ya Habari Ruvuma

Septemba 6,2021.