ZAIDI ya watu 68,000 wanaishi na Virusi vya UKIMWI Ruvuma

Imewekwa kuanzia tarehe: November 26th, 2024

JUMLA ya watu 68,237 wanaishi na virusi vya UKIMIWI (VVU) Mkoani Ruvuma.

Hayo yamesemwa na Mkuu wa Mkoa wa Ruvuma Kanali Ahmed Abbas Ahmed  wakati anazungumza kwenye ufunguzi wa maadhimisho ya siku ya UKIMWI Duniani  ambao umefanyika katika uwanja wa Majimaji mjini Songea.

Kanali Abbas amesema kati ya watu hao,wanaume ni 24,959  na wanawake ni 43,238 na kwamba Watoto chini ya  umri wa miaka  15 wenye VVU ni 2,382 sawa na asilimia 3.5 na watu wazima wenye umri wa kuanzia miaka 15 ni 65,855 sawa na asilimia 96.5.

Amezitaja Halmashauri zinazoongoza kuwa na idadi kubwa ya watu wenye VVU kuwa ni Manispaa ya Songea yenye watu 18,398,Tunduru watu 9,888 na Halmashauri ya Mbinga watu 9,003.

“Natoa wito kwa waathirika wote kuzingatia tiba na matunzo,ufuasi wa dawa za ARV ni uzima na zinaimarisha afya ya watu wanaoishi na VVU ,hivyo nawaasa wananchi kuacha unyanyapaa na ubaguzi,Mkoa utaendelea kuwajengea mazingira mazuri  watu wanaoishi na VVU ili kujiwezesha kiuchumi’’,alisisitiza Kanali Abbas.

Amesema maambukizi ya VVU katika Mkoa wa Ruvuma katika mwaka 2022 hadi 2023 ni asilimia 4.9  na kwamba kiwango hicho kimepungua ukilinganisha na mwaka 2016/2017 ambacho kilikuwa ni asilimia 5.6 .

Hata hivyo  amesema  kiwango hicho cha maambukizi katika Mkoa wa Ruvuma bado kipo juu  zaidi ya kiwango cha kitaifa kwa asilimia 0.5 ambacho ni asilimia 4.4.

Amesema kiwango cha maambukizi mapya ya VVU kimepungua kwa asilimia 28.6 kutoka watu 3.035 mwaka 2017 hadi kufikia watu 2,168 mwaka 2022 ambapo kwa mwaka 2023 watu 1,889 walipata maambukizi mapya ya VVU katika Mkoa wa Ruvuma

Kaulimbiu ya maadhimisho ya UKIMWI kwa mwaka huu ni chagua njia sahihi,tokomeza UKIMWI ambapo kilele cha maadhimisho hayo ni Desemba Mosi ambapo mgeni rasmi anatarajiwa kuwa Makamu wa Rais Dkt.Philip Mpango