DED Mbinga asisitiza matumizi ya nishati safi shuleni

Imewekwa kuanzia tarehe: February 16th, 2025

Mkurugenzi wa Halmashauri ya Wilaya ya Mbinga Joseph Kashushura ameendelea kutoa msisitizo juu ya matumizi ya Nishati safi ya kupikia kwa Shule zote za Sekondari zilizopo katika Halmashauri  ya Wilaya ya Mbinga akisisitiza kuwa ni Sera ya Serikali katika kutunza mazingira.

Mkurugenzi Kashushura ametoa rai hiyo katika tafrija fupi ya utoaji wa tuzo za taaluma kwa shule za Sekondari Halmashauri ya Wilaya ya Mbinga.

Amesisitiza kuwa  Halmashauri ya Wilaya ya Mbinga ina makaa ya mawe ambayo hutumika kuzalisha mkaa mbadala ambao ni  mojawapo ya nishati safi ya  kupikia hivyo  amewataka  walimu hao kutumia fursa hiyo ambayo wengi wanatamani kuwa nayo.

"Haiwezekani  tuna rasilimali katika eneo letu alafu bado tuna shangaa shangaa itafikia pointi watu wengine watatoka  katika maeneo mengine kuja kuchukua mzigo huku"Amesema

Kwa upande wake Kaimu Afisa Maliasili na Mazingira  Halmashauri ya Wilaya ya Mbinga Chrispine  Haonga ameeleza kuwa Halmashauri  imeendelea kutoa elimu na kuhamasisha  Jamii juu ya matumizi ya nishati safi za kupikia.

Ikumbukwe Julai 11, 2024 Halmashauri ya Wilaya ya Mbinga ilikabidhi tani 10 za mkaa  mbadala utokanao na makaa ya mawe kwa shule za msingi 15 na Shule za Sekondari 15.

Akithibitisha faida za matumizi safi ya nishati za kupikia Padre Chistopher Mapunda Mkuu wa Seminari ya Likonde ameeleza kwa miaka mingi Seminari ya Likonde ilikuwa inatumia  kuni kwa ajili ya kupikia hatua ambayo ilipelekea uharibifu  wa misitu lakini kwa sasa Shule inanufaika na matumizi ya  nishati ya mkaa mbadala wa  makaa ya mawe.

Kwa upande wa Shule ya Sekondari Kigonsera  Makamu Mkuu wa Shule  Joseph Komba  ameeleza kuwa kwa sasa shule hiyo imendokana na matumizi ya kuni kwa ajili ya kupikia na badala yake shule inatumia nishati ya gesi pamoja na nishati ya makaa ya mawe.