HALMASHAURI ya Madaba yapitisha bajeti ya bilioni 12

Imewekwa kuanzia tarehe: March 13th, 2021

HALMASHAURI ya Madaba wilayani Songea mkoani Ruvuma imepanga  kukusanya na kutumia zaidi ya shilingi bilioni 12 kwa ajili ya Maendeleo katika mwaka wa fedha 2021/2022.

Akizungumza katika kikao maalum cha kupitisha bajeti hiyo kilichofanyika kwenye ukumbi wa Halmashauri mjini Madaba,Mkurugenzi Mtendaji wa Halmashauri hiyo Shafi Mpenda amesema katika uandaaji wa bajeti wa mwaka 2021-2022,Halmashauri imezingatia miongozo na maelekezo mbalimbali ya Serikali.

Ameitaja miongozo hiyo kuwa ni  ukusanyaji wa mapato  na utendaji wa Rasilimali fedha, mpango  wa maendeleo ya Taifa wa miaka mitano 2021 mpaka 2025 ambapo mpango huo unazingatia vipaumbele vya kisekta kama vile Fedha,Elimu,Mifugo,uvuvi,Afya, uthibibiti wa maji taka,Utalii na Viwanda.

“Halmashauri imezingatia katka uandaji wa bajeti 2021-2022  Ilani ya Chama cha Mapinduzi ya Uchaguzi Mkuu wa  2020, hotuba ya Rais  wa Tanzania na hotuba ya Waziri Mkuu  na ziara yake ya tarehe 4 mpaka 7  Januari 2021 Mkoani Ruvuma na kuzingatia masuala mtambuka kama Magonjwa ya Ukimwi,Maafa,Mazingira na Rushwa,mkakati wa kukuza uchumi na kupunguza umaskini  pamoja na maelekezo mbalimbali yanayotolewa na viongozi wa Mkoa na Taifa”,alisema.

Naye Mwenyekiti wa Halmashauri hiyo Teofanes Mlelwa akizungumza wakati anakifunga kikao hicho amewataka wataalamu wa Halmashauri hiyo  kufanya kazi kwa weledi ili kuwe na tija na ufanisi katika kuwahudumia wananchi.

Mlelwa ametoa rai kwa wataalam hao kuwasikiliza wananchi na kutatua kero zao kwa sababu bajeti imepitishwa hivyo ushirikiano wa watendaji unahitajika zaidi.

Imeandikwa na Albano Midelo

Afisa Habari Mkoa wa Ruvuma

Machi 13,2021.