HOMA ya nguruwe inavyoleta umaskini kwa wafugaji Nyanda za Juu kusini

Imewekwa kuanzia tarehe: August 13th, 2020

Daktari wa mifugo Mkuu Kanda ya Nyanda za Juu Kusini  Dr. Solomon Nong’ona akizungumzia ugonjwa wa homa ya nguruwe katika Kanda hiyo,  anasema Idadi ya nguruwe Tanzania ni karibu milioni 2.14  kati ya hao asilimia 90 wanafugwa na wakulima wadogo.

Dr.Nong’ona anasema wakulima hukosa njia sahihi za kuzuia magonjwa, elimu ya ufugaji na mipango bora ya kuzalisha nguruwe hao  na kwamba ufugaji wa nguruwe katika mikoa ya Nyanda za Juu Kusini una vikwazo vingi na moja ya hivyo ni uwepo Homa ya nguruwe (ASF)

Abainisha zaidi kuwa homa ya nguruwe ni ugonjwa ulioanzia kwa mara ya kwanza katika  Halmashauri ya Kyela katika mkoa wa Mbeya,Kutoka Novemba 2010 hadi sasa mwaka 2020 ugonjwa huo umeathiri karibu kila halmashauri  zilizopo katika mikoa ya Nyanda za Juu Kusini.

“Kuanzia Novemba 2019 hadi Machi 2020 mkoa wa Njombe  ndiyo uliokuwa na matukio mengi kwenye Halmashauri za Makambako na Njombe  ya homa ya nguruwe,Ugonjwa umeenea pia katika Mkoa wa Iringa kwenye Halmashauri za Kilolo, Mafinga na Mufindi’’,anasema Dr.Nong’ona.

Hata hivyo Daktari huyo wa Mifugo  anasema,Februari 2011 Homa ya nguruwe imeendelea kutawanyika  katika Halmashauri ya Nyasa kwenye ukanda wa Ziwa Nyasa mpaka katika Mkoa wa Ruvuma kwenye  Halmashauri ya Wilaya ya Nyasa,Halmashauri ya Wilaya ya Mbinga,Halmashauri ya Wilaya ya Songea na  Halmashauri ya Manispaa ya Songea.

Anabainisha zaidi kuwa Machi 2011,ugonjwa wa homa ya nguruwe ulikuwa tayari umefika katika Halmashauri za  wilaya za Chunya, Mbarali na Rungwe katika Mkoa wa Mbeya na  Halmashauri ya Wilaya ya  Ileje kwenye Mkoa wa Songwe

Anasema asilimia 60 ya nguruwe waliopo nchini Tanzania wanatoka Nyanda za Juu Kusini katika  mikoa ya  Mbeya, Iringa, Ruvuma, Songwe na Njombe

“Mradi wa nguruwe unaweza kuzalisha faida mpaka shilingi 252,165,100.00 (US$109,637.40) kwa mwaka katika nchi ,Wakati huo huo ugonjwa huu unaweza kusababisha hasara ya mpaka shilingi 2,094,922,800.00 (US$910,836.70)  kwa mwaka katika nchi kwa hiyo mradi wa kufuga nguruwe ni benki inayotembea’’,anasisitiza Dr.Nong’ona.

Anasema mikoa ya Nyanda za Juu kusini ina Halmashauri 31 na kwamba ni  halmashuari 14 tu ndizo hivi sasa  zimeathirika sana na Homa ya nguruwe  ambazo anazitaja kuwa ni Halmashauri ya Mji  Makambako, Halmashauri ya Wilaya ya Njombe na Halmashauri ya Mji Njombe.

Halmashauri nyingine  anazitaja kuwa ni Mbarali, Chunya, Mbozi, Tunduma, Mufindi, Halmashauri ya Mji  Mafinga,Halmashauri ya wilaya ya Mbinga, Halmashauri ya Mji  Mbinga, Halmashauri ya Ludewa,Halmashauri ya Songea na Halmashauri ya Manispaa ya Songea.

Imeandikwa na Albano Midelo

Afisa Habari Mkoa wa Ruvuma

Februari 13,2020

Mbeya