HOSPITALI za Halmashauri 184 kufaidika na madaktari Bingwa

Imewekwa kuanzia tarehe: May 6th, 2024

Wizara ya Afya kwa kushirikiana na Ofisi ya Rais TAMISEMI inaendesha kampeni maalum ya kusogeza huduma za afya za kibingwa katika hospitali za Halmashauri  184  Tanzania Bara.

Hayo yamesemwa na Mwakilishi kutoka Wizara ya Afya Faraja Mgeni kwenye ufunguzi wa kambi ya matibabu ya kibingwa na ubingwa bobezi ya  Dkt.Samia  mkoani Ruvuma.

Madaktari bingwa 40  wameanza kutoa huduma za kibingwa katika Hospitali za Halmashauri zote nane mkoani Ruvuma,kuanzia Mei 6 hadi 10,2024

Mgeni amesema katika kipindi cha kuanzia Machi 2023 hadi kufikia Machi 2024  Wizara ya Afya kwa kushirikiana na TAMISEMI ilifanikiwa kuwajengea uwezo watoa huduma za afya Zaidi ya 4000  walioweza kutoa  huduma za kibingwa  kwa wananchi Zaidi ya 10,956.

“ ili kuimarisha huduma za afya kwa wananchi Wizara ya Afya na TAMISEMI inaendelea kuendesha kampeni maalum ya kusogeza huduma za afya za kibingwa katika hospitali za Halmashauri nchini,kampeni hii tunaianza leo Mei 6  na kukamilika Mei 28 mwaka huu na tutakuwa tumezifikia hospitali  184 zilizopo Tanzania bara’’,alisema.

Hata hivyo amesema katika Mkoa wa Ruvuma kampeni ya huduma za kibingwa inaanza Mei 6  na kukamilika Mei 10 mwaka huu na kwamba wananchi wanasogezewa huduma za kibingwa bobezi katika hospitali nane za  Halmashauri mkoani Ruvuma.

Ametoa rai kwa Viongozi katika ngazi zote mkoani Ruvuma kushirikiana na madaktari bingwa hao na kuhamasisha wananchi kujitokeza kwa wingi ili kupata huduma hizo za kibingwa.

Kwa upande wake mgeni rasmi kwenye ufunguzi huo,Mkuu wa Mkoa wa Ruvuma Kanali Ahmed Abbas Ahmed ambaye aliwakilishwa na Kaimu Katibu Tawala wa Mkoa wa Ruvuma Mhandisi Gilbert Simiya, ameipongeza serikali kwa kutoa madaktari bingwa na bingwa bobezi wa Dkt.Samia Suluhu Hassan ambao wamefika kutoa huduma za kibingwa mkoani Ruvuma.

Kanali Abbas ametoa rai kwa madaktari hao kufanya kazi yao kwa ufanisi mkubwa kwa kuwa serikali imeboresha upatikanaji wa vifaa tiba na kwamba serikali inaendelea kuboresha huduma za afya mkoani Ruvuma.

“Katika Mkoa wa Ruvuma serikali imetoa shilingi bilioni 18.721  kutekeleza miradi ya afya ikiwemo ujenzi wa hospitali ya Rufaa ya Mkoa,ujenzi wa hospitali za Halmashauri,vituo vya afya na zahanati’’,alisisitiza Kanali Abbas.

Ameitaja miradi mingine iliyotekelezwa mkoani Ruvuma ni ukarabati wa hospitali kongwe ya Halmashauri ya Wilaya ya Tunduru,Mbinga Mji na ujenzi wa majengo ya huduma za dharura (EMD) katika hospitali za Tunduru,Nyasa,Madaba na Hospitali ya Rufaa ya Mkoa.

Kwa upande wake Mganga Mkuu wa Mkoa wa Ruvuma Dr.Louis Chomboko akizungumza kwenye ufunguzi huo amesema madaktari bingwa hao  wanatekeleza mpango kabambe wa huduma za mkoba nchini lengo likiwa ni kuboresha huduma za kibingwa karibu na wananchi katika ngazi ya Halmashauri.

Amewataja madaktari bingwa hao wanatoka katika hospitali za rufaa za mikoa,hospitali za Kanda,hospitali ya Taifa  na maalum na kwamba huduma za kibingwa zinazotolewa ni ubingwa  wa akinamama na uzazi,Watoto,upasuaji,magonjwa ya ndani,utoaji dawa za ganzi na usingizi.

Kampeni hii ya ina kauli mbiu ya madaktari bingwa wa Rais Samia tumekufikia karibu tukuhudumie ambayo imelenga kuhakikisha wananchi wote wanapata huduma za kibingwa katika Halmashauri zao ili kuwapunguzia gharama za kusafiri umbali mrefu.