KATIBU Tawala Mkoa wa Ruvuma akagua miradi ya maendeleo Songea vijijini

Imewekwa kuanzia tarehe: August 21st, 2020

Katibu Tawala wa Mkoa wa Ruvuma Bw Steven Ndaki amehimiza ukamilishaji wa ujenzi wa miradi ya maendeleo inayojengwa katika Halmashauri ya Wilaya ya Songea mkoani Ruvuma.

Ndaki amesema hayo alipotembelea na kukagua miradi ya maendeleo inayojengwa katika Halmashauri ya Wilaya Songea hivi karibuni.

Ndaki amesema ameridhishwa na  ujenzi wa miradi inayoendelea kujengwa pia amepongeza kazi nzuri iliyofanywa na kuagiza dosari ndogo ndogo  zirekebishwe.

“Jitihada iongezwe ili miradi yote ikamilike na ianze kutoa huduma kwa wananchi”,alisema Ndaki.

Ametoa  rai kwa wananchi kuanza kupata matibabu katika Hosptali ya Wilaya ya Mpitimbi ambayo imeanza kutoa huduma hiyo kuanzia Julai 15 mwaka huu.

Ameagiza katika  ujenzi wa miradi ya maendeleo inyotekelezwa ndani ya mkoa kwa njia ya force akaunti suala la uzalendo ni muhumu likapewa kipaumbele kwasababu linalinda maslahi  na uaminifu katika ujenzi na utekelezaji wa mradi husika.

Kwa upande wake Mkurugenzi Mtendaji wa Halmashauri ya Wilaya ya Songea Simon Bulenganija ameishukuru timu ya ukaguzi kwa kukagua miradi na kutoa mapendekezo ambayo yanasaidia kuboresha ujenzi wa miradi hiyo.

Bulenganija amesema jitihada za ukamilishaji wa miradi zitaongezwa na miradi itakamilika na kuanza kutoa huduma kama lengo la serikali linavyoelekeza la utoaji huduma kwa wananchi hasa wanyonge.

Katibu Tawala wa Mkoa wa Ruvuma katika ziara hiyo amekagua Jumla ya miradi nane ikiwemo ujenzi wa kituo cha afya cha  Matimira, Magagura,Hosptali ya Wilaya iliyopo Mpitimbi na miradi mitano ya ujenzi wa vyoo bora (SWASH) vinavyojengwa  katika shule  za Msingi Mpitimbi, Mkurumusi,Peramiho ,Mapinduzi na Humbaro.

Imeandikwa na

JACQUELEN CLAVERY

AFISA HABARI SONGEA DC.