KAYA zaidi ya 4,000 Tunduru kunufaika na kilimo cha umwagiliaji

Imewekwa kuanzia tarehe: July 19th, 2024

ZAIDI ya kaya 4,000 katika Halmashauri ya wilaya Tunduru mkoani Ruvuma,zinatarajia kunufaika na fursa ya kilimo cha umwagiliaji kupitia utekelezaji wa mradi wa skimu ya umwagiliaji ya Nambarapi iliyopo kata ya Masonya wilayani humo.

Mradi huo unaotekelezwa na Serikali kupitia Tume ya Taifa ya umwagiliaji,utawanufaisha wakulima wanaolima mazao mbalimbali ikiwemo Mpunga,mahindi pamoja na mazao ya mboga mboga.

Akitoa taarifa ya utekelezaji wa mradi huo Mhandisi wa umwagiliaji mkoa wa Ruvuma  Lusia Chaula alisema,mradi utatekelezwa kwa muda wa siku 560 kuanzia tarehe 15 Julai 2024 na utakamilika tarehe 31 Disemba 2025.

Chaula amezitaja gharama za mradi ni Sh.6,314,477,066.00 na utajengwa kwa kumtumia Mkandarasi kampuni ya M/S Company Ltd JV Otendo ambapo zaidi ya ekari 1,700 zimetengwa kutumika kwenye mradi huo.

Kwa mujibu wa Chaula, kazi zilizopangwa kutekelezwa  ni ujenzi wa banio na tuta,ujenzi wa mfereji mkuu mita 5,975,ujenzi wa mfereji wa upili mita 8,825,kujenga mfereji wa matupio,ujenzi wa barabara za mashamba,ujenzi wa vivusha maji na ofisi ya Mhandisi wa mradi

Kwa upande wake Mkurugenzi Mtendaji wa Halmashauri ya wilaya Tunduru Chiza Marando amesema,haijawahi kutokea katika wilaya hiyo kuwa na mradi wa umwagiliaji wenye thamani kubwa tangu wilaya ilipoanzishwa.

Marando amesema,mradi wa skimu ya umwagiliaji Nambarapi unakwenda kutoa uhakika wa chakula na kupatikana kwa ajira za muda kwa vijana wengi wanaotoka katika kata ya Masonya na wilaya ya Tunduru kwa ujumla.

“kupitia mradi huu tuna mhakikishia Mheshimiwa Rais  Dkt Samia Suluhu Hassan kwamba,wilaya ya Tunduru tutaendelea kuwa  na uwezo mkubwa wa kuzalisha na uhakika wa chakula ambacho kinaweza kutosheleza mahitaji ya wananchi wetu”alisema.

Mkuu wa wilaya ya Tunduru Simon Chacha,amemtaka mkandarasi kuhakikisha anatekeleza mradi huo haraka na  kwa viwango kama ilivyo kwenye makubaliano yaliyopo katika mkataba.

Chacha,amemshukuru Rais Dkt Samia Suluhu Hassan kwa jitihada anazofanya za kuleta maendeleo  katika wilaya ya Tunduru ikiwemo kutoa zaidi ya Sh.bilioni 6.3 fedha ambazo zitatumika kutekeleza mradi huo wa umwagiliaji utakaowanufaisha wananchi wengi hususani wakulima wa wilaya ya Tunduru.