MAHAKAMA Kuu Kanda ya Songea yazindua wiki ya sheria

Imewekwa kuanzia tarehe: January 27th, 2025

Mkuu  wa Mkoa wa Ruvuma, Kanali Ahmed Abbas Ahmed, amesema Mahakama ndio chombo pekee chenye wajibu wa kupiga vita dhuluma, uonevu, ukwepaji kodi, ubadhilifu wa mali za umma na matumizi mabaya ya mamlaka.

Ameyasema hayo wakati wa uzinduzi wa Maadhimisho ya Wiki ya Sheria Nchini kwa Kanda ya Songea uliofanyika katika viwanja vya soko kuu la Manispaa ya Songea mkoani Ruvuma.

"Ni dhahiri kuwa Mahakama ina kazi ya kupiga vita dhuluma, uonevu, ukwepaji kodi, ubadhilifu wa mali za umma, matumizi mabaya ya mamlaka au ofisi, kwa kuwa mahakama ndio chombo pekee chenye wajibu huo, nawaomba mfanye kazi zenu bila urasimu ama ukiritimba, na katika kufanya hivyo sio tu kwamba mtazidi kuheshimika bali pia mtapata thawabu mbele za Mwenyezi Mungu," alisema Kanali Ahmed.

Amewakumbusha wananchi kuwa chombo pekee cha kutatua mgogoro au shauri la aina yoyote ni Mahakama na sio sehemu nyingine, isipokuwa kwenye migogoro ambayo sheria imezipa taasisi zingine mamlaka ya kuisikiliza ili kuondoa migongano ya kimaslahi kati ya Mahakama na taasisi zingine.

Kwa upande wake Jaji Mfawidhi Mahakama Kuu Kanda ya Songea, Mhe. James Karayemaha, amesema kauli mbiu ya maadhimisho hayo mwaka 2025 inayosema "TANZANIA YA 2050; Nafasi ya taasisi zinazosimamia haki madai katika kufikia malengo makuu ya dira ya taifa ya maendeleo" imebeba ujumbe mzito juu ya wajibu wa Mahakama na taasisi zinazoshughulikia haki madai katika kuhakikisha wanafikia malengo ya Dira ya mpango wa maendeleo ya Tanzania ya Mwaka 2050.

Amesema katika wiki hiyo ya sheria, Mahakama pamoja na wadau wa sheria watawaelimisha wananchi ndani ya mkoa wa Ruvuma juu ya shughuli za Mahakama kama chombo chenye mamlaka ya utoaji haki kikatiba na jinsi wadau na wananchi wanavyoshirikiana na chombo hicho katika utoaji haki, umuhimu wa amani, uzingatiaji wa sheria, kukwepa matumizi ya nguvu na kuchukua sheria mkononi ili kujenga misingi imara ya amani, mshikamano na umoja kwenye mkoa.

Ameongeza kuwa wananchi wataelimishwa kuhusu maboresho yanayoendelea ndani ya mahakama ikiwa ni pamoja na matumizi ya TEHAMA, ambapo watapewa elimu na wataalamu namna ya kupakua hukumu yake moja kwa moja kutoka mtandao unaoitwa TanzLII badala ya kusubiri hukumu iliyosomwa katika jengo la Mahakama Kuu, hivyo wananchi watumie wiki ya sheria kupata na kuongeza maarifa ya kisheria.