MBINGA wajenga wodi tatu kwa kutumia fedha za mapato ya ndani

Imewekwa kuanzia tarehe: July 10th, 2024

Mkurugenzi wa Idara ya Afya Ustawi wa Jamii na Lishe Ofisi ya Rais-TAMISEMI Dkt. Rashid Mfaume amempongeza Mkurugenzi wa Halmashauri  ya Wilaya ya Mbinga Joseph Kashushura kwa kutenga fedha Shilingi Mil. 120  kutoka mapato ya ndani  kwa ajili ya kutekeleza ujenzi wa wodi tatu ( wanaume, wanawake, watoto) zinazojengwa katika Hospitali ya Halmashauri  ya Wilaya ya Mbinga.

Dkt. Mfaume ametoa pongezi hizo katika ziara ya ufatiliaji  na usimamizi shirikishi iliyofanywa na  timu ya wataalam kutoka OR-TAMISEMI kukagua utoaji wa huduma katika Hospitali ya Halmashauri ya Wilaya ya Mbinga  Julai 9, 2024.

"Nimpongeze sana Mkurugenzi  wa Halmashauri  ametoa kipaumbele na kutenga fedha za mapato ya ndani sio kwamba hana vitu vingine vinavyohitaji fedha ila ameona umuhimu  wa wodi hizi kwa wananchi" Amebainisha Dkt. Mfaume

Sambamba na hilo amempongeza Mganga Mfawidhi wa Hospitali  ya Halmashauri ya Wilaya  ya Mbinga kwa kukusanya  Shilingi Mil. 141 na kuvuka makisio ya makusanyo ya Shilingi Mil. 30 kwa mwaka fedha 2023/2024.

Amemtaka kufuata taratibu na miongozo  ya matumizi ya fedha hizo  ili kuondoa mianya ya matumizi ya fedha mbichi inayopelekea  upotevu wa  fedha.

Dkt. Mfaume amewataka watoa huduma wa Hospitali  hiyo kuhakikisha wanatoa huduma bora kwa wananchi akisisitiza kuwa huduma inayotolewa iendane na uwekezaji mkubwa  unaofanywa na Serikali.