MBINGA watakiwa kubuni vyanzo vipya vya mapato

Imewekwa kuanzia tarehe: February 10th, 2024

Mkuu wa Wilaya ya Mbinga mkoani Ruvuma Mheshimiwa Aziza Mangosongo ameuagiza uongozi wa Halmashauri ya Mji wa Mbinga kubuni vyanzo vipya vya mapato  ili kuongeza makusanyo.

Mangosongo ametoa agizo hilo wakati  anazungumza kwenye Mkutano wa Baraza la Madiwani uliofanyika katika Ukumbi wa  Halmashauri ya Mji wa Mbinga.

“Mbuni yanzo vipya vya mapato na vilivyopo mvilinde na kuvisimamia vizuri ili kuongeza mapato ya ndani,”alisisitiza Aziza.

Mkuu wa Wilaya ametaja Mapato kuwa ni  ndiyo roho ya Halmashauri kwa kuwa bila mapato Halmashauri haiwezi kutekeleza shughuli za maendeleo kikamilifu.

Mangosongo amekemea tabia ya baadhi ya watumishi kutumia pesa mbichi  kabla ya kuipeleka benki ambapo amesema tabia hiyo haikubaliki.

Kwa upande wake Mkurugenzi wa Halmashauri ya Mji wa Mbinga Amina Self amesema katika mwaka wa Fedha  wa 2022/2023 Halmashauri ya Mji wa Mbinga ilikusanya Shilingi bilioni 2.128 kama mapato ya ndani.

Amesema katika mwaka wa fedha  wa  2023/2024 Halmashauri inatarajia kukusanya Shilingi bilioni 2.476 kama mapato ya ndani.

Naye Mwenyekiti wa Halmashauri ya Mji wa Mbinga Mheshimiwa Kelvin Mapunda amesema wamedhamiria kusimamia ukusanyaji wa mapato kwa kuongeza kasi ya ukusanyaji ili kufikia na kuvuka lengo la ukusanyaji wa mapato.