MFUMO wa stakabadhi ghalani waleta manufaa kwa wakulima wa Tunduru

Imewekwa kuanzia tarehe: August 25th, 2021

BEI ya kuuza mbaazi za wakulima katika wilaya ya Tunduru mkoani Ruvuma kupitia mfumo wa stakabadhi ghalani imezidi kupanda zaidi kutoka wastani wa Sh.1,294  hadi kufikia Sh.1,341 kwa kilo moja.

Afisa Ushirika wa wilaya ya Tunduru George Bisani amesema,katika minada yote miwili jumla ya kilo 1,505,849  kati ya hizo kilo 360,551 zimeuzwa katika mnada wa kwanza kwa bei ya  Sh.1,294 kwa kilo moja.

Amesema, katika mnada wa pili uliofanyika katika kijiji cha Semeni jumla ya kilo 1,145,498 zimeuzwa kwa bei ya Sh.1,391 na kufanya jumla ya fedha zote zilizoingia kwenye mzunguko kutokana na minada  miwili ya mbaazi wilayani Tunduru kufikia Sh. Bilioni 1,536,167,320.00.

Kwa upande wake Meneja Mkuu wa Chama Kikuu cha Ushirika wilaya ya Tunduru(Tamcu Ltd)Imani Kalembo amesema, huo ni mnada wa pili  wa zao la mbaazi kufanyika katika wilaya hiyo katika msimu wa kilimo wa mwaka 2020/2021.

Kalembo amesema, katika mnada huo makampuni matano yamejitokeza kununua mbaazi na kampuni ya Lenic Tanzania Ltd imeshinda  kutokana na kutangaza  bei ya Sh.1,341 kwa kilo moja ikiyazidi makampuni mengine.Amesema, katika mnada huo jumla ya tani 1,042 sawa na kilo 1,145,498 zimeuzwa ambapo bei ya kilo moja  ya mbaazi ni Sh.  1,341.

Amesema, Chama Kikuu cha Ushirika kina furaha kuona bei ya mbaazi  inaongezeka katika kila  mnada  kutoka Sh.1,294 katika mnada wa kwanza uliofanyika  katika kijiji cha Mtonya hadi  kufikia Sh 1,341 mnada wa pili uliofanyika kijiji cha Semeni.

Amewataka wakulima kutokubali kushawishika na wanunuzi wa kati wanaonunua mbaazi kwa bei ndogo ya Sh. 800 kwa kilo ambayo haina faida, badala yake kuendelea kuuza mbaazi zao  mfumo wa stakabadhi ghalani kupitia vyama vya msingi vya ushirika.

Ametoa wito kwa makampuni  mbalimbali,kwenda katika wilaya hiyo kununua mbaazi ambazo zinapatikana kwa wingi na kuhakikisha wananunua kwa bei nzuri ili kuhamasisha wakulima waweze kuzalisha kwa wingi.

Baadhi ya wakulima wa mbaazi katika kijiji hicho wameishukuru  Serikali kwa kuliingiza zao  hilo katika mfumo wa stakabadhi ghalani kwa kuwa umewasaidia  kupata soko la uhakika na bei nzuri kutoka Sh. 250  hadi 300 kwa kilo moja.

Wamesema, kuanzishwa kwa  mfumo wa stakabadhi ghalani kwa zao la mbaazi na mazao mengine ya kimkakati ikiwemo zao maarufu la korosho kumewasaidia  kuwa na uhakika wa bei nzuri na kuepuka kulanguliwa na wanunuzi wa mitaani wasiokuwa  na huruma kwao.

Hadija Omari(43)amesema, kama serikali itaendelea na kusimamia mpango wa kuuza mbaazi kwa mfumo wa stakabadhi ghalani basi wakulima wengi watahamasika kuongeza uzalishaji na hivyo kuondokana na umaskini katika familia zao.

Ameitaka Serikali kuhakikisha inawabana na kuwachukulia hatua kali baadhi ya wanunuzi wachache wanaopita mashambani na vijijini kuwalaghai wakulima, ili wauze mbaazi kwa bei ndogo isiyolingana na gharama halisi za uzalishaji.

Omari Misoya amesema, licha ya malipo kuchelewa  mara wanapouza,lakini mfumo wa stakabadhi ghalani umesaidia kupata bei nzuri ya mbaazi wanazolima ikilinganisha na bei za walanguzi wa mitaani.

Amesema,mfumo  huo umeleta heshima kubwa  kwa mkulima na pia usalama wa fedha wanazolipwa kwani zinapitia moja kwa moja benki badala ya kupewa mkononi jambo ambalo ni hatari kwa maisha yao.Hata hivyo, ameiomba Serikali kuyabana makampuni yanayonunua  mbaazi kulipa fedha  kwa wakulima haraka ili waweze kutatua changamoto zinazowakabili kwenye familia zao  mahitaji ya shule kwa Watoto wao.

Imeandikwa na Muhidin Amri Tunduru