NEEMA yawashukia walimu 54,000,kupandishwa madaraja Julai 2024

Imewekwa kuanzia tarehe: June 5th, 2024

Jumla ya walimu 54,000 nchini ambao waliachwa nyuma kimadaraja wanatarajia kupandishwa madaraja yao ifikapo  Julai 2024 ili kuleta usawa wa madaraja kwa kuzingatia kiwango cha Elimu na muda wa Ajira.

Hayo yamesemwa na Mwakilishi wa Katibu Mkuu TAMISEMI ambaye pia ni Afisa Elimu Mkoa wa Dodoma Vicent Kayombo  wakati anazungumza na walimu wilayani Mbinga Mkoani Ruvuma.

“Katibu Mkuu TAMISEMI amenituma nije niwaambie kwanza Serikali inatujali sana sisi walimu haijatusahau inataka walimu wote wawe kwenye hali sawa ikilinganishwa na kiwango cha elimu na madaraja yao’’,alisema Kayombo

Hata hivyo amesema wakati Serikali inaendelea kuboresha sekta ya elimu nchini Kayombo, inawataka walimu hao kutimiza majukumu yao ya kusimamia malezi ya wanafunzi na kuhakikisha wanafunzi wote wanapata umahiri.

Amesema kuna baadhi ya Walimu hawatimizi majukumu yao na wengine wanadiriki kuwaambia wanafunzi  baadhi ya masomo ni magumu yakiwemo masomo ya Sayansi na Hisabati ambapo amesema  hakuna somo gumu.

Mwakilishi huyo wa Katibu Mkuu TAMISEMI amewataka Wakuu wa Shule na walimu wakuu kuimarisha Ushirikiano na Walimu ili kurahisisha Utendaji kazi na Kuboresha ujifunzaji na ufundishaji.

Kwa upande wake Kaimu Mkurugenzi wa Halmashauri ya Wilaya ya Mbinga Maurus Hyera ameahidi kutekeleza maagizo yote ambayo yametolewa na Katibu Mkuu Ofisi ya Rais TAMISEMI.

Baadhi ya walimu wilayani humo wameishukuru serikali kwa kuboresha maslahi ya walimu ikiwemo kuhakikisha walimu ambao hawajapandishwa madaraja wanapandishwa katika mwaka mpya wa fedha wa 2024/2025.