NMB yazindua tisheti 500 zitakazotumika katika tamasha la Majimaji Selebuka

Imewekwa kuanzia tarehe: August 11th, 2020

Benki  ya NMB Tawi la Songea  mkoani Ruvuma imezindua rasmi tisheti 500 zilizogharimu shilingi milioni tano kwa ajili ya Tamasha la Majimaji Selebuka spesho.

Tisheti hizo  zitatumika kwa wanafunzi watakaoshiriki  midaharo itakayofanyika kwenye tamasha hilo  la Majimaji Selebuka ambalo litafanyika kwa siku saba katika uwanja wa Majimaji mjini Songea .

Akizungumzia Tamasha hilo Meneja wa NMB kanda ya kusini Janeth Shango amesema Tamasha hilo  limelenga kuendeleza Utalii wa Mkoa wa Ruvumu,ujasiriamali  na kukuza Michezo kwa wanafunzi  na kwa watu wazima.

‘’ NMB tukiwa jirani ya jamii na kama  wadau wa wajasiriamali, tumeona ni vema kushiriki katika tamasha hili ili tuweze kushirikiana na kusaidia  kufanya tamasha hili liweze kuwa zuri zaidi mwaka huu’’,alisisitiza.

Shango amesema Benki ya NMB watakuwepo katika viwanja vya majimaji kwa wiki moja na watatoa huduma za kifedha  na kutoa Elimu kwa wajasiriamali, na wanafunzi  watafundishwa jinsi ya kujiwekea akiba, pamoja na mambo yote  yanayohusiana na mikopo na ufunguzi wa akauntina namna ya kuendesha.

Hata hivyo Meneja wa NMB kanda ya kusini amesema watakuwa na wataalamu wa Kilimo na watatoa Elimu kwa wakulima jinsi gani wafanye wanapotaka kulima na kuvuna mazao kwa wingi.

Kwa upande wake Meneja wa NMB Tawi la Songea Daniel Zake amewashukuru wananchi kwa kuwa wateja wa Benki ya NMB ambapo katika tamasha hilo NMB watakuwa na masomo mbalimbali ya vikundi vidogovidogo,Benki jamii(VICOBA)  na jinsi ya kujiwekea akiba kwa Fedha ndogo walizonazo ili  kukuza kipato katika maisha yao.

‘’Tamasha  la Maji maji Selebuka ni tamasha kubwa ambalo linakuwa na mambo mengi ya kujifunza hasa katika elimu ya  Kifedha  kwa upande wa mikopo na riba nafuu na kutumia mifumo ya kidijitali na namna gani   unaweza kuwa nyumbani na kufanya miamala Mbalimbali na kuwahudumia waliombali kupitia simu ya mkononi’’,alisisitiza Zake.

Zake amesema Katika tamasha hilo itakuwa sehemu sahihi kupokea maoni kwa wateja wa NMB na  jinsi gani  wanaweze kufanya vizuri ka ili waweze kuhudumia wateja kwa kile wanachokitarajia wateja wa Mkoa wa Ruvuma kutoka Benki ya NMB.

Imeandikwa na Albano Midelo

Afisa Habari   wa  Mkoa wa Ruvuma

Agosti 11,2020