RAS RUVUMA atahadharisha utoaji takwimu zisizo sahihi

Imewekwa kuanzia tarehe: October 9th, 2024

Na Gustaph Swai- Rs Ruvuma

Katibu Tawala wa Mkoa wa Ruvuma Bi. Mary Makondo ametahadharisha kuwa takwimu zisizo sahihi zinaweza kusababisha upotevu wa rasilimali  na kuchelewesha maendeleo yanayotakiwa kuonekana katika jamii

Ameyasema hayo wakati akifungua mafunzo ya Mfumo wa fursa na vikwazo kwa maendeleo (O&OD) Ulioboreshwa kwa Waratibu wa Mfumo huo kwa Halmashauri za Mkoa wa Ruvuma yaliyofanyika katika ukumbi wa Halmashauri ya Manispaa ya Songea.

"Takwimu zisizo sahihi zinaweza kusababisha upotevu wa rasilimali na kuchelewesha maendeleo tunayotamani kuyaona katika jamii", Alisema.

Amewataka Waratibu hao kutoa takwimu sahihi na kufanya kazi ili kuwa na taarifa zilizo sahihi kwani matarajio kuanzia ngazi ya Taifa hadi Msingi ni makubwa na wananchi wanahitaji maendeleo.

Amewaagiza wataratibu kuandaa taarifa mapema, kuzikamilisha na kuziwasilisha kwa wakati na kufanya kazi kwa weledi  kwani bila ya kuwa na taarifa ni sawa na kutokufanya kazi na kushindwa kuwajibika jambo ambalo ni kosa.

Ametoa rai kwa Waratibu hao kuacha kufanya kazi kwa mazoea kwani hali hiyo inachelewesha kufikiwa kwa malengo ya Serikali  na kuwakosesha Wananchi maendeleo na kuwataka kubadilika na kujipanga vyema kufanya kazi kwa ufanisi.

Sanjari na hayo ameeleza kuwa Mfumo wa fursa na vikwazo ulioboreshwa ni moja ya  juhudi zinazofanywa na Serikali kwa ajili ya kuwajengea uwezo Wananchi ili Kuwaongezea ari ya ushiriki kwa kupanga na kusimamia shughuli za maendeleo.

Amelitaja lengo la maboresho ya Mfumo huo kuwa ni kuhakikisha wanaweza kutatua changamoto zilizokuwa katika mfumo wa awali kama vile ushiriki hafifu, jamii kukosa Moyo wa umiliki wa miradi na kuongezeka kwa utegemezi wa jamii kwa Serikali.

Amesema mfumo huo ni nyenzo muhimu katika mchakato wa maendeleo ya jamii zetu hivyo unatarajiwa kuleta faida za Moja kwa Moja katika kuleta utoaji wa huduma na maendeleo  endelevu.

Naye Katibu Tawala Msaidizi Mkoa wa Ruvuma Ndg.Jumanne Mwankhoo amewasisitiza Waratibu kubadilika na kujenga Utamaduni wa kufanya kazi bila kuhimizwa.