RC IBUGE aipongeza Halmashauri ya Nyasa kwa kutoa mikopo kwa asilimia 100

Imewekwa kuanzia tarehe: June 22nd, 2021

MKUU wa Mkoa wa Ruvuma Brigedia Jenerali  Wilbert Ibuge, ameipongeza Halmashauri ya Wilaya ya Nyasa kwa kutoa mikopo kwa asilimia 100  yenye thamani ya tsh 66,600,000/- kwa  makundi ya wanawake, vijana na watu wenye ulemavu.

Amezitoa pongezi hivi karibuni katika mkutano maalum wa baraza la madiwani wa kujadili taarifa ya Mdhibiti na Mkaguzi Mkuu wa Hesabu za Serikali kwa mwaka 2019/2020,wilaya ya Nyasa uliofanyika katika Ukumbi wa Kepteni John Komba Mbamba bay Wilayani Nyasa.

RC Ibuge amefafanua kuwa Kwa mara ya kwanza Halmashauri ya Wilaya ya Nyasa imetoa mikopo kwa asilimia 100 kwa mchanganuo ufuatao, Wanawake milioni 37,600,000, vijana, 19,000,000 kundi la watu wenye ulemavu 10,000,000.

Pia ameipongeza Halmashauri kwa kufikia  asilimia 82.95 ya lengo la kukusanya mapato ya ndani ya Tsh 1,475,667,800,hata hivyo imefanikiwa kukusanya Tsh 1,219,874,204,53, na  ameitaka Halmashauri ya Nyasa kukusanya mapato kufikia asilimia 100 kwa mwaka wa fedha unaoishia Juni 2021.

“ninachukua fursa hii kuipongeza sana hii Halmashauri kwa dhati kabisa kwa kutoa mikopo yenye thamani ya Tsh 66,600,000/= kwa makundi ya wanawake, vijana na watu wenye ulemavu kwa kuwa makundi hayo ni muhimu sana katika Uzalishaji mali”,alisema .

Aidha amewaagiza Madiwani na watendaji wa Halmashauri kufanya kazi kwa ushirikiano ili kuweza kuinua makusanyo na kutekeleza miradi ya maendeleo.

Kwa Upande wake Mwenyekiti wa Halmashauri ya Wilaya ya Nyasa Mhe.Stewart Nombo ameahidi kutekeleza maagizo yote kwa maslahi ya wananchi.

Imeandaliwa na Netho Credo

Afisa habari Halmashauri ya Nyasa

Mei 21,2021