RC RUVUMA awachangia wamachinga mifuko 50 ya saruji

Imewekwa kuanzia tarehe: January 31st, 2024

Mkuu wa Mkoa wa Ruvuma Kanali Laban Thomas amewahaidi wamachinga wa Manispaa ya Songea kuchangia mifuko 50 ya saruji na kugharamia uchimbaji shimo la choo chao.

Kanali Thomas ametoa ahadi hiyo wakati akizungumza baada ya kusikiliza kero mbalimbali za  wamachinga katika viunga vya Soko la Majengo Mjini Songea.

Amesema hapendi kuwaona wamachinga wanafanya biashara kwenye mazingira magumu ambapo amewataka wamachinga wote kufanya biashara kwenye maeneo waliyotengewa na serikali.

 Kanali Thomas amewaomba wafanya biashara kuwa wazalendo katika kutoa pesa  za kuchangia gharama za kuzolea taka Kwa mzabuni wao ili kuweka mazingira safi na salama ya Soko na mji wa Songea kwa ujumla.

Katika hatua nyingine Kanali Thomas amemuagiza Mkurugenzi wa Manispaa ya Songea Dkt Frederick Sagamiko kuwakamata watoto wa shule wanafanya biashara sokoni na Kwenda kuwaonesha wafanyabiashara wanaowatumikisha kufanya biashara  badala ya Kwenda shule.

Katika kikao hicho  Mkuu wa Mkoa amemuuagiza Mwakilishi wa Meneja wa NMB Noela Minja kuendelea kutoa mikopo na elimu ya biashara  kwa wamachinga ili wakuze biashara zao.

Minja amesema Benki ya NMB hadi sasa   imetoa mikopo  kwa wamachinga 35 ambao wamekidhi vigezo vya kupata mikopo,Meneja huyo pia  ameahidi  kutoa shilingi  100,000 kuchangia ujenzi wa choo cha wamachinga.

Kwa upande wake Mkurugenzi wa Manispaa ya Songea Dkt Frederick Sagamiko amehaidi katika ujenzi wa choo hicho kutoa bati na malipo ya fundi ili kukamilisha ujenzi kwa wakati.

Kwa upande wake Meneja Msaidizi wa TANESCO Mashauri Adamu ameahidi kuchangia shilingi 300,000 kwa ajili ya ujenzi wa choo cha wamachinga.

Awali Mwenyekiti wa Wafanyabiashara Wadogo Mkoa wa Ruvuma Salum Masamaki amemshukuru Mkuu wa Mkoa kwa kufika kusikiliza kero za wamachinga na kuzitafutia ufumbuzi.