RC RUVUMA awakabidhi wakuu wa Wilaya magari mapya

Imewekwa kuanzia tarehe: July 11th, 2024

 Mkuu wa Mkoa wa Ruvuma Kanali Ahmed Abbas Ahmed amewakabidhi wakuu wa Wilaya watatu magari mapya ya kisasa yaliyonunuliwa na serikali.

Hafla ya kukabidhi magari hayo imefanyika kwenye viwanja vya ofisi ya Mkuu wa Mkoa mjini Songea ambapo wakuu wa Wilaya za Tunduru,Mbinga na Namtumbo wamekabidhiwa magari hayo.

Akizungumza kabla ya kukabidhi magari hayo, Mkuu wa Mkoa wa Ruvuma amemshukuru Rais Dkt.Samia Suluhu Hassan kwa uwezeshaji mkubwa wa fedha uliosababisha kupatikana kwa vifaa vya usafiri ambavyo vinakwenda kutumika na wakuu wa Wilaya.

Amesema kwa kuanzia serikali ilitenga bajeti ya kununua magari mapya kwa wakuu wa wilaya watatu ambao walikuwa na changamoto kubwa ya magari ambapo amewatia moyo wakuu wa wilaya ambao hawajapata magari  mapya kuwataka wawe na Subira kwa kuwa serikali itaendelea kutenga bajeti  ya ,kununua magari.

“Magari haya yamenunuliwa kwa fedha nyingi,hivyo thamani ya fedha inatakiwa kuakisi thamani ya fedha iliyotumika kwa kuwahudumia wananchi kwenye maeneo yao,wananchi wanatamani kuona changamoto zinazowakabili zinatatuliwa’’,alisisitiza.

Kwa upande wake Mkuu wa Wilaya ya Namtumbo Mheshimiwa Ngollo Malenya akizungumza kwenye hafla hiyo,amempongeza Rais Dkt.Samia Suluhu Hassan kwa kutoa fedha za kununulia magari kwa wakuu wa wilaya za Mkoa wa Ruvuma.

Amesema ukosefu wa magari kilikuwa  ni kilio cha muda mrefu kwa wakuu wa wilaya ambapo iliwalazimu wakati mwingine kuazima magari kwa wakuu wa Idara ili Kwenda kutatu changamoto kwa wananchi.

Awali Katibu Tawala wa Mkoa wa Ruvuma Rehema Madenge  aliyataja magari mapya yaliyonunuliwa na serikali kuwa ni gari lenye namba  STN 2928 ambalo limenunuliwa kwa ajili ya Mkuu wa Wilaya ya Tunduru,gari STN 2929 kwa ajili ya Mkuu wa Wilaya ya Mbinga na STN 2927 kwa ajili ya Wilaya ya Namtumbo.

Madenge amesema magari hayo yatawasaidia wakuu wa Wilaya hizo kutekeleza majukumu yao ya kila  siku ya ufuatiliaji na  kutatua changamoto mbalimbali zinazowakabili wananchi

 vijijini.