RUVUMA washerehekea kuzaliwa kwa Rais kwa kukata keki

Imewekwa kuanzia tarehe: January 28th, 2025

Mkuu wa Mkoa wa Ruvuma, Kanali Ahmed Abbas, ameongoza hafla ya kukata keki ya upendo kusherehekea siku ya kuzaliwa kwa Rais wa Jamhuri ya Muungano wa Tanzania, Dkt. Samia Suluhu Hassan.

Hafla hiyo imefanyika Januari 27, 2025, katika ofisi ya Mkuu wa Mkoa na kuhudhuriwa na viongozi wa serikali, wakuu wa wilaya, viongozi wa Chama Cha Mapinduzi (CCM), watumishi wa umma na wanahabari.

Akizungumza katika hafla hiyo, Kanali Abbas alimpongeza Rais kwa kuongeza mwaka mwingine wa maisha na kumtakia afya njema, hekima na uvumilivu katika kulitumikia taifa. Pia, aliwashukuru watumishi wa umma na kuwasihi waendelee kufanya kazi kwa uadilifu na bidii.

Kwa upande wake, Mwenyekiti wa CCM Mkoa wa Ruvuma, Komred Oddo Mwisho, alisema chama kinaungana na viongozi wa mkoa kumpongeza Rais Samia, akisisitiza kuwa mchango wake kwa taifa unakumbukwa kila mwaka wa kuzaliwa kwake.

Hafla hiyo ilihitimishwa kwa dua na sala kwa ajili ya Rais pamoja na mshikamano wa viongozi katika kumtakia maisha marefu na mafanikio katika uongozi wake.