SERIKALI yafikisha umeme vijiji 81 Nyasa

Imewekwa kuanzia tarehe: April 20th, 2024

 SERIKALI  imetatua kero ya umeme katika Halmashauri  ya Wilaya ya Nyasa mkoani Ruvuma baada ya kufikisha huduma ya umeme katika vijiji 81 kati ya vijiji 84 vilivyopo wilayani humo.

Mkuu wa Wilaya ya Nyasa Mheshimiwa Peres Magiri amesema katika Wilaya ya Nyasa vimebakia vijiji  vitatu ambavyo bado havina umeme ambavyo Mkandarasi yuko kazini anaendelea na kazi ya kupelaka Umeme katika vijiji  hivyo.

Magiri ameyasema hayo wakati anazungumza na Wananchi wa Kijiji cha Ndengere Kata ya Mbamba bay Wilayani Nyasa.

Amewataka wananchi  ambao hawajapata huduma ya umeme kuwa wavumilivu kwa kuwa nia ya Serikali  ni kufikisha umeme katika ngazi ya kila kijiji na awamu itakayofuata ni kufikisha umeme katika  ngazi ya Kitongoji.

“Serikali yetu ni Sikivi kama imeweza kupeleka umeme katika Vijiji 81 katika Wilaya ya Nyasa haitashindwa kufikisha umeme katika Vitongoji’’,alisisitiza.